Mannan ija bulii viessu Guovdageainnu márkanbáikkis. Viessu bulii measta buot gutnan, ja buot mii lei siste, lea vaháguvvon.
Ođaštuvvon dii. 09:40.
Mannan ija bulii viessu Guovdageainnus. Viessu lei jo bures buoláskan go heahteveagat ollejedje báikái.
Buollinčáskadeaddjit geahččaledje čáskadit dola, muhto politiijat čálle ihkku Twitteris ahte lea jáhkkimis ahte viessu buollá gutnan.
Politiijaid operašuvdnajođiheaddji Andreas Vesterhus čilge Ávvirii ahte viessu lea buollán measta gutnan.
– Jáhkkimis lea vaháguvvon buot mii viesus lei, lohká son.
Šaddet vuordit dassá go čoasku
Lei buollindoaimmahat mii dieđihii politiijai buollima birra. Buollinčáskadeaddjit ledje ožžon cavgileami ahte suovastii báikkis. Politiijat eai dieđe vel manne viessu buollái.
– Mii eat sáhte čađahit iskosiid ovdal go viessu lea čoskon. Mii vulggiimet báikkis beal gávccis, dalle ledje buollinčáskadeaddjit čáskadan dola. Mii leat gidden guovllu, ja šaddat vuordit oalle guhká ovdal go beassat iskat báikki, lohká Vesterhus.
Evakueren ránnjáid
Viesu olbmot eai lean ruovttus. Politiijat leat hupman viessoeaiggádiin, guhte duođaštii ahte viesus ii lean okta ge.
Politiijat áigot gažadit viessoeaiggáda buollima birra.
Viessu mii bulii lea ásodatbáikkis, Guovdageainnu márkanguovddážis.
– Mii fertiimet lagamus ránnjáid sihtat guođđit viesuideaset, go balaimet buollima leavvat, lohká Vesterhus.
Buollin ii leavvan, ja buollinčáskadeaddjit nagodedje čáskadit dola.