Bukte garra cuigodemiid eiseválddiide

Lapp Affair – Unfinished Business lea alvvus ođđa produkšuvdna ja lea hui hárve go Sámi stuorámus artistat rahkadit oktasaš musihkka ođđaáigásaš hámis.

Musihkka ja dáidda ovttastuvvon

Joavkkus ledje Mari Boine, Sofie Jannok ja Elle Márjá Eira geat ledje lávde nalde oktanis. Sámi nuorra dáiddárat Anders Sunna ja Máret Ánne Sara ges oassálasttiiga iežaska dáidagiiguin.

Máret Anne lei installašuvnnaiguin rahkadan visuálalaš činaheami maid geahččit besse oaidnit sihke lávde nalde ja olggobealde kulturviessu.

Anders Sunná leiges rahkadan visuála hámiid dan konsertii.

– Attii vuoimmi

Dat stuora multimedia konsearta/čájálmas gos joavku buvttii gárra cuiggodemiid politihkalaš sáhki ja lei hui ealas govaheapmi.

Go konsearta álggi lei sis sámeleavga ja gárrá rytmmalaš rumbbut maiguin vuosttaldedje stuorraservodaga.

– Máilmmi buorre. Mun gal lean leamašan ollu konsearttain iežan eallimis, muhto dá gal lei okta dain buoremus konsearttain maid mun lean vásihan. Dat gal attii vuoimmi, issoras fámolaš vuoimmi, logai Beaska Niillas guhte lei okta dain geat ledje guldaleamen konseartta.

Mari ain modearna

Loahpas loahpaheaddji sii Mari Boine lávlagiin: «Alla hearrát» mas teavsttas daddjo: Høye herrer langt der nede i Oslo, muhto Oslo sadjái ledje biddján Stockholm.

Loahpas dadje vel lávdde nalde ahte Ruoŧas ja Suomas lea vel ollu maid ferte njulget.

Sámediggeráđđelahttu Henrik Olsen lei maid konsearttas, son logai Mari Boine imponeren:

– Mus gal ledje gárrá dovddut. Das ledje čoahkkanan sámi beakkáneamos musihkkárat gos sii čađahedje modearna musihka maid «eadni» ja Mari Boine lea ráhkadan. Mari gal mu mielas imponere, su musihkka čájeha ahte ii leat bázahallan daid nuorat buolvvaid ektui. Su musihkka lea ain seamma modearna odne nai ja sii ollistedje guđet guimmiineaset hui bures, lohká Olsen.

– Dat bargu maid sii ovddastedje lei garra kommentára ja ledje áibbas čielga historjjálaš linját ja sáttasátni maid ovdanbukte, lasiha son.

Duorastaga deaivvadedje vuosttaš geardde

Ieža artisttat ledje duđavaččat maŋŋil konseartta, buohkat goittot ge gesse ovdan ahte lea oanehis áiggis bidjan čoahkkái konseartta, eai ge leat guhká ráhkkanan.

– Mu mielas orui mannamin hui bures go jurddaša man oanehis áigi mis lei ráhkkanit. Muhtun detáljat eai mannan nu movt leimmet háliidit. Lei hui miellagiddevaš bargat ovttas nuorra musihkkáriiguin. Dat lei hui fámolaš ja lea nu somá go bohtet nuorra dáiddárat ja juoigit mat maid čullet min áššiid, logai Mari Boine maŋŋil konseartta.

Elle Márjá Eira muitalii ahte dán konseartta oktavuođas deaivvadedje sii vuosttaš háve mannan duorastaga.

– Mus lea hui buorre dovdu. Ja munnje lea leamašan erenoamáš dehálaš. Leamašan somá bargat earáiguin ovttas nu go Sofie Jannok, Mari Boine, Máret Ánne Sara ja Anders Sunnain. Jua lei hui somá, logai son.

Bearaš boahtán guldalit

Sofia Jannok lei maid duđavaš konsearttain.

– Dat gal manai nu jalla bures, mun gal jáhkán ahte mii leat visot hirpmástuvvan go nagodeimmet bidjat dán visot čoahkkái oanehis áiggis, logai son.

Son dáiddii maid duđavaš go máŋggas su lagamusain ledje astan boahtit konsertii.

– Mu mii mielas gal lei hui buorre. Dat lei miellagiddevaš oaidnit vissot daid installašuvnnaid, filbma, govat ja musihkka lei hirbmat buorre. Somá go leat golbma artista lávlume oktanis, logai Sofia viellja Nila Jannok maŋŋil konseartta.

Maiddái Sofia váhnemat Ella Brit Utsi ja Anders Jannok leigga konsearttas, soai logaiba maid sudno mielas leamašan buori konseartta.

Dat geat ledje mielde: Mari Boine, Sofia Jannok og Elle Márjá Eira. Anders Sunna og Máret Ánne Sara – visuals ja installašuvnnat. Čuojahanjoavkkus: Roger Ludvigsen, Morten Pettersen, Johan Eglund, Gunnar Augland, Georg Buljo, Peter Baden, Simon Eraker Vido Čuovga: Birk Nygård

Čállán ja govven: Mikkel-Per Sara