Eai leat dušše plastihkat mearas mat dagahit ruskaáitaga elliide. Juohke jagi jápmet olu gusat go leat borran bastilis metállabihtáid fuođđara bokte, dieđiha Gjensidige forsikring ASA preassadieđahusas.
2018 dieđihuvvojedje 60 dáhpáhusa Oapmedárkkesteapmái go njamatgusa ledje juoidá borran mii lei bastil čoavjái, ja 1181 gusa, vuoksá ja gálbbi Gussadárkkisteapmái.
Gussaeallit eai nagot sirret amasoačči fuođđaris, ja nu metállabihtát gevvet čoavjái.
Vuola- ja bruvsabovssat šaddet fuođđarii
Dávjá bohtet dát bihtát metállabovssain dahje lásebohttaliin maid olbmot bálkestit luoddagurrii.
Lájuid áigge sáhttet dát šaddat mielde ja verdnejuvvot unna bihtážiidda, ja daid lea váttis de fuomášit.
– Dá lea okta vel buorre ágga manin ii bálkut ruskkaid lundui. Jus metállabihttá verdnejuvvo, de sáhttá dan buohtastahttit dego borrat niibbi. Ealli sáhttá de vásihit siskkáldas vardima, vuolšši ja buot vearrámus; hirbmat bávččas jápmima, dadjá Gjensidige gulahallanhoavda Pål Rune Eklo.
Stuora elliidgillámuš
– Elliiddáhkádus addá buhtadusa, sihke jus ealll jápmá ja doallovahága ovddas mii čuožžila maŋŋel, muhto dat ii oro jeđđehus go buohtastahttá biidnahuvvama maid eallit vásihit. Mii jáhkkit leat stuora loguid mat eai boađe oidnosii lassin daidda mat dieđihuvvojit, dadjá Eklo.
Son lasiha ahte boanddat gal dan dihtet ja leat čeahpit čoaggit ruskkaid luoddaguoras sin gittiid lahka, muhto oallugat geat vánddardit meaddel gal eai várra jurdil ge daid váikkuhusaid birra go ruskkaid bálkot.
