-Almmuhus-
OĐĐASATBovdii oahpásmuvvat boraspire hálddašemiin

Bovdii oahpásmuvvat boraspire hálddašemiin

-

-

Sámediggi lágidii bora­spire seminára Gardermoenis, ulbmilin lei ođđa nammaduvvon boraspirelávdegotti ­lahttut galget oahpás­muvvat ásahusain geat hálddašit boraspire gažaldagaid.

Sámediggi lágidii maŋŋebárgga ja gaskavahku boraspire seminára Sámedikki nammaduvvon lahtuide regionála boraspirelávdegottiin. 

Semináras galge oasseváldit oažžut dieđuid, earret eará Sámedikki boraspirepolitihka birra eanadoalus ja boazodoalus ja boraspirepolitihka strategiijaid birra.

Oasseváldit galget maiddái oažžut dieđuid boraspirelávdegottiid bargguid birra ja galget oahpásmuvvat guhtet guimmiideasetguin. Leat logaldallit earret eará Biras- ja dálkkádatdepartemeanttas, SNO:s, NINA:s, lávdegottelahtuin ja Sámedikkis.

 

Ođđa lahttut

Sámediggeráđđelahttu Berit Marie Eira lei gii jođihii seminára Gardermoenis.

Son muitala Sámediggi nammada juohke njealját jagi lahtuid boraspirelávdegottiide, ja dál go lea leamaš válga de lea lunddolaš lágidit álggahan seminára, ovdal go áirasat álget lávdegottis bargat.

– Ulbmilin lea go leat ođđa áirasat, ahte sii ožžot buoret ipmárdusa makkár bargu lea lávdegottis, ja mo sii galget bargat viidáseappot dan 4 jagi go galget doppe leat, lohká Sámediggeráđđelahttu Berit Marie Eira.

 

Oahpásmuvvat

Sámediggi lei bovden logaldalliid earret eará Biras- ja dálkkádatdepartemeanttas, SNO:s, NINA:s, Sámedikkis ja Sámedikki boraspirelávdegottis logaldallat.

– Go galgá bargat dákkár bargguin, de ferte dovdat mo sii barget. Go lea dákkár seminára ja sii besset njunnálaga jearrat gažaldagaid. Dan bokte olle guhkkelebbui, ovdal go neahta bokte oaidnit maid dat barget. Dat mii dás lea hui dehálaš, lea ahte iešguđetge ásahusat bohtet deike ja gullet maid ealáhusat oaivvildit ja dáppe sáhttá maiddái jearrat olu gažaldagaid, lohká son.

 

Sávvá ásahit sámi dutkan ásahusa

Okta dain fáttáin semináras lea árbevirolašmáhttu ja dat máhttu galggašii vuođđuduvvot maiddái dutkamii.

– Min ulbmil lea ahte galggašii leat sámi dutkan ásahus mii čađaha dutkama, muhto ii oru nu sihkkar ahte šaddá nu. NINA dutki logai logaldallamis ahte sis lea áigumuš doallat oktavuođa ja háliidivčče ovttasbarggu. Dat leat leamaš olu dutkamat mat leat dagahan ahte ii sápmelaš jáhke daidda, go dat oaidná dien dutkamis váilo dat sámi oaidnu ja máhttu, lohká son.

 

Gelddolaš fáttát

Boraspirelávdegotti 8. regiovnna áirras, Karen Anette Anti, doalai logaldallama boraspirehálddašeami árbedieđu birra.

Su mielas ledje gelddolaš fáttát semináras.

– Mii leat beassan gullat iešguđetge lágan boraspire áššiid birra ja riikagaskasaš perspektiivva riektevuogádaga boraspire ektui. Go gullen dan, de jurddašin dien gal berre máhttit bajil, go leat nu olu dehálaš dieđut hálddašeami ektui. Dat lea čájehuvvon makkár váttisvuođat leat boraspiriin ja dat eai unno gal, šaddá dušše váddásat boraspirehálddašemiin birget, lohká Karen Anette Anti.

 

Gelbbolašvuohta lahtuin

– Vuhtto leat hui olu gelbbolašvuohta daid ođđa lahtuin geat dál leat válljejuvvon, ja šaddá hui somá čuovvut sin viidáseappot, loahpaha Sámediggeráđđelahttu Berit Marie Eira.

-Almmuhus-