-Almmuhus-
-Almmuhus-
OĐĐASATBovdejuvvon gonagaslaš gállámállásii: – Lean viggan ohcat mo galggan láhttet

Bovdejuvvon gonagaslaš gállámállásii: – Lean viggan ohcat mo galggan láhttet

-

-

Bearjadaga geassemánu 17. beaivvi ávvuduvvo prinseassa Ingrid Alexandra riegádanbeaivi gállámállásiin šloahtas. Dohko leat bovdejuvvon majestehtalaš guossit miehtá máilmmi, muhto maiddái Elle Rávdná Näkkäläjärvi lea ožžon saji mállásiidda.

Elle Rávdná Näkkäläjärvi Guovdageainnus eret lea Sámedikki nuoraidpolitihkalaš lávdegotti (SáNuL) jođiheaddji. SáNuL ásahuvvui bissovaš orgánan 2003 rájes. SáNuL:s leat vihtta bissovaš lahtu maid Sámediggeráđđi lea nammadan. Lahtut leat gaskal 16- ja 28-jahkásaččat, miehta riikka nuorat.

– Midjiide lea hui somá oažžut bovdehusa, go mii galgat ovddastit sámi nuoraid Sámedikkis. Lea fiinnis ahte šloahtta ja gonagas dan dohkkehit, muitala Elle Rávdná Näkkäläjärvi.

Son muitala ahte ievtta ja otná ávvudeapmái leat bovdejuvvon nuorat miehtá Norgga, ja bearjadahkii leat maid olu organisašuvnnat bovdejuvvon.

– Min Sámediggi gullá Norgga beallái nu ahte mii leat maid oassin Norgga álbmogis, ja lea dehálaš ahte min maid oidnet, dadjá son.

Ii lean vuordit goassege beassat dakkár doaluide

– Mun in dieđe maid galggan vuordit. Illudan oaidnit makkár šloahtta lea siskkobealde ja maiddái jus beasan dearvvahit prinseassa ja bearraša. In lean vuordán goassege beassat dakkár doaluide, ja hirpmástuvven go ožžon dakkár bovdehusa. Hui somá ja mun illudan, muitala Näkkäläjärvi.

Näkkäläjärvi maid muitala ahte lea viggan ohcat neahtas mo galgá láhttet jos beassá dearvvahit gonagaslaččaid.

– Mun lean veahá jearahan mo galggan dahkat jos galggan dearvvahit gonagasa. Galggan go mun «bukket» vai «neiet». Mun viggen ohcat neahtas mo galgá láhttet, ja juoga sajis čuožžu ahte galgá nu čiekŋalit «bukket» ahte beassá studeret gonagasa skuovaid, muhto in dieđe galggan go dien rávvaga čuovvut, dadjá son ja čaibmá.

-Almmuhus-