-Almmuhus-
-Almmuhus-
-Almmuhus-
KULTUVRABovdejit vuorrasat boazodolliid deaivvadeapmái

Bovdejit vuorrasat boazodolliid deaivvadeapmái

-

-

Kárášjoga Johttisámiid searvi lea lágidišgoahtán deaivvademiid vuorrasat badjeolbmuid várás.

Ihttin doallá Kárášjoga Johttisámiid searvi nuppi deaivvadeami vuorrasat boazodolliide. Fáddán dán deaivvadeapmái lea Badjeolbmuid árgabeaivi ja eallin ovdal ja maŋŋá soađi Kárášjoga boazodoalloguovllus.

 

Anne Jannok Eira, guhte lea mielde lágideames deaivvademiid muitala miellahtuid ieža sávvan dákkáraš deaivvademiid. Deaivvadeamit leat sidjiide geat leat 60 jahkásaččat ja boarráseappot.

– Muhto nuorat olbmot gal ožžot maid boahtet jus háliidit, čaibmá lágideaddji.

 

Miellahtut ieža háliidan deaivvademiid

Kárášjoga Johttisámiid searvi lea NBR báikkálaš searvi, ja Jannok Eira muitala NBR ulbmilparagráfas čuožžut ahte searvi galgá ovddidit ja bargat boazosápmelaččaid beroštumiid vuođul ja daid ovddas.

– Boazosámi vuorrasiidda galget gávdnot sierra arenat ja deaivvadanbáikkit gos besset ságastallat ja gullat oahpes ja váibmoáššiid birra, lohká Jannok Eira.

 

Lonohallat vásáhusaid

Son muitala alddiineaset leat olu jurdagiid ja plánaid deaivvademiid dáfus.

– Ulbmil lea maid áiggi mielde lágidit deaivvademiid gos mánát, nuorat ja vuorrasat olbmot servvoštallet ja dahket praktihkalaš bargguid. Ovdamearkka dihte sáhttet málestit ja gumppostit ja nu lonohallat vásáhusaid ja máhttu, čilge Jannok Eira.

– Vuorrasat olbmot leat resursan servodahkii ja erenoamážit boazodoalu servodahkii, muhto dán áigge eai šatta buolvvat ovttastallat nu mo dolin, mánát ja nuorat leat mánáidgárddiin ja skuvllain ja vuorrasat olbmot ges dávjá okto, mii leat nu bieđganan dán áigge, oaivvilda lágideaddji.

 

Čájehit boares govaid

Deaivvadeapmi lágiduvvo Sámiid Vuorká-Dávviriid visttis Kárášjogas ihttin lávvardaga diibmu 12:s gitta 15 rádjai. Juohke deaivvadeamis leat sierra fáttát. Vuosttaš deaivvadeami dolle giđđagease, dalle ii lean makkárge fáddá.

– Dat lei vuos dakkár vuosttaš deaivvadeapmi. Muhto Sámiid Vuorká-Dávvirat leat hirbmasit veahkehan min ja ledje dalle čohkken boares govaid maid čájehedje ja nu vulggii ságastallan.

Ihttá deaivvadeamis gal lea soađeáigi fáddán, maiddái dál lea musea veahkehan lágideddjiid ja čohkken soađeáigge govaid.

– Boarrasat olbmot dávjá hállet ovdal ja maŋŋil soađi birra. Fáddá dattege ii galgga ráddjet ságastallama, muhto jáhkán ahte lea álkit ságastišgoahtit go lea juoga mainna álgá, lohká Jannok Eira.

 

Jannok Eira oaivvilda dákkár deaivvademiid buoridit dearvvašvuođa ja eallin kvalitehta.

– Vuorrasat olbmot besset dovdat ahte beroštat sis, ahte mii oaidnit ja gullat sin vásáhusaid ja historjjá. Vaikke sii eai soaitte šat beaivválaččat nagodit searvat boazodollui, de besset dovdat ahte leat mávssolaččat ja resursan, čilge son.

 

 

-Almmuhus-