Sámi Musihkkafestivála dieđiha ahte dál oažžu dieđihit lávlagiid Sámi Grand Prix lávlun- ja juoigangilvui mii lea beassážiid Guovdageainnus.
Sámi Musihkkafestivála dieđiha ahte dál oažžu dieđihit lávlagiid Sámi Grand Prix lávlun- ja juoigangilvui mii lea beassážiid Guovdageainnus.
Sámi Grand Prix (SGP) lágiduvvo juohke jagi beassášlávvordaga Guovdageainnus masa buohkat sáhttet searvat.
Eavttut beassat árvvoštallojuvvot
Sii geat háliidit searvat fertejit sáddet luođi dahje lávlaga lágideaddjái man leat bádden, nu go CD-hámis dahje digitála hámis. Luohti galgá leat árbevirolaš vuogi mielde musihka haga. Jus luođis leat čuojanasat, de biddjojuvvo luohti lávlunoassái.
Muđui dieđiha Sámi Musihkkafestivála (SMF) ahte lávlla galgá leat sámegillii ja lea vejolaš geavahit báddejuvvon osiid, muhto ferte ovdanbuktot sámegillii. Lea maid vejolaš iežas joavkkuin searvat, muhto SGP ii mávsse liigegoluid ovddas mat čuožžilit.
Luohti dahje lávlla ii galgga leat ovdal almmuhuvvon, ja plagiáhtat eai dohkkehuvvo.
Vuoittut
Vuoitu lea 20 000 ruvnno sihke lávlun- ja juoiganoasis. Dasa lassin ožžot vuoitit stipeandda, mainna galget lágidit konseartta Sámi Musihkkafestivála stuoralávddis Báktehárjjis maŋit beassážiid. Stipeanda lea 30 000 ruvnno juoiganoasis, ja 50 000 ruvnno lávlunoasis. Eaktun oažžut dan stipeandda lea lágidit konseartta maŋit jagi Sámi Musihkkafestivála oktavuođas.
Nuppi sajis lea 7500 ruvnno vuoitu ja goalmmát sajis 3000 ruvnno, goappašat oasis. Dasa lassin ožžot juoigit njealját ja viđát sajis juoiganoasis 1000 ruvnno goabbáge.
