Listanjunnošat galget gažaduvvot, ja sii hástaluvvojit gielisvuohtadetektor iskosiin, debáhta ja čiekŋalis jearahallamiid bokte.
NRK Sápmi ja Ávvir bovdejit sámepolitihkalaš «kick-off» doaluide dán jagáš válgagičču olis Romssa Kulturviesus borgemánu 23. beaivvi.
Ávvir ja NRK Sápmi čohkkejit gávcci sámi bellodaga njunnošiid debáhttii, diibmu 17.30 gaskavahku borgemánu 23. beaivvi Kulturviesus Romssas. Debáhtta čájehuvvo njuolggosáddagis neahta bokte.
Diibmu 14.00 rájes lágida NRK Sápmi sámepolitihkalaš «vorspiela» NRK rádio (DAB Sámi Radio) bokte, mii sáddejuvvo maid njuolgga Romssa Kulturviesus. Debáhttii leat geahččit bures boahtimat diibmu 17.00 rájes.
Govven: Dragan Cubrilo/NRK Sápmi
Gielistit go?
Geahččin beasat don jearrat gažaldagaid earret eará Aili Keskitalos (NSR), Ronny Wilhelmsenis (Bb) ja dálá sámediggepresideanttas Vibeke Larsenis (Šiella).
Beasat maid oaidnit bohtosiid gielisvuohtadetektor-iskosis mii dahkko árabuš dan beaivvi. Guhte vástida rehálaččamusat priváhta gažaldagaide, ja gii gávnnahallá gielisteames?
– Jáhkán šaddá veahá earálágan digaštallan go masa leat hárjánan. Illudan gaskavahkkui, šaddá garra gižžu, muitala Ávvira journalista Sara Máret Ravdna Oskal.
Ávvira bealis lea Sara Máret Rávdná Oskal prográmmajođiheaddjin debáhtas.
Gávcci bellodaga
Bb, NSR, Árja, Šiella, Olgeš, Ovddádusbellodat, Nordkalottfolket, ja Guovddášbellodat servet debáhttii.
– Dán jagi válga lea buot miellagiddevaččamus válga mii goassege leamaš, go lea leamaš olu riedja ja personriiddut siskkáldasat bellodagain, lohká NRK Sámi Thor Thrane.
Son lea okta dain geat galget lágidit NRK Sámi rádiosáddaga ovdal debáhta, ja lohpida buori sisdoalu goappašat osiin.
– Mii háliidit ahte politihkkárat vástidit makkár sámi servodat galgá šaddat boahtteáiggis. Oažžut go čielga vástádusaid dán háve, lohká Anne Marie Hætta, guhte lea debáhta nubbi prográmmajođiheaddji.
Njuolggosátta neahtas álgá diibmu 17.30, álggos lea «vorspiela» ja ieš debáhtta álgá diibmu 18.00:s gaskavahku borgemánu 23. beaivvi.
