Sámi giellalávdegoddi bovde rájáidrasttideaddji paneladigaštallamii.
Sámi giellalávdegoddi bovde rájáidrasttideaddji paneladigaštallamii.
Sámi giellalávdegoddi bovde nuoraid Norggas, Ruoŧas ja Suomas digaštallat sámegielaid bohtteáiggi lávdegotti boahtte čoahkkimis Romssas mii lágiduvvo borgemánu loahpas.
– Mun sávan nuorat hástalit min Sámi giellalávdegottis. Lea dál ahte sis lea vejolašvuohta váikkuhit min ja buktit buriid cealkámušaid, dadjá lávdegoddejođiheaddji Bård Magne Pedersen preassadieđáhusas.
Nuoraid vástádus čuolmmaide
Lávdegotti bargu lea geahčadit sámegielaid ortnegiid, doaimmaid ja njuolggadusaid, sii galget árvvoštallat ja árvalit čovdosiid mat álkidahttet sámegielaid geavaheami. Nuorat besset dál váikkuhit lávdegotti barggu, digaštallamis besset nuorat muitalit mo sin galggašii geasuhit válljet sámegiela skuvllas, makkár arenain lea sin mielas dárbu sámegielaide sihke dál ja boahtte áiggis ja mii livččii buorre geaidnu jus galggašii eambbosiid geasuhit geavahit ja oahppat sámegiela. Dasa lassin besset nuorat muitalit iežaset jurdagiid sámegiela boahtte áiggi birra.
Dárbbašlaš nuoraiguin gulahallat
Sámi giellalávdegoddi galgá guovvamánus boahtte jagi ovdanbuktit rapportas iežaset gávdnosiid ja rapporttaid. Jođiheaddji oaivvilda ahte lea dehálaš gulahallat nuoraiguin ovdal loahpahit iežaset guorahallamid.
– Mun oaivvildan ahte fertet jurddašit guhkesáigásaččat. Sámi giellalávdegoddi ferte leat boahtteáigásaš, danin lea dárbbašlaš gulahallat nuoraiguin, dadjá Pedersen.
