Suoma Sámi Nuorat -searvi doallá miellačájáhusa dan vahku, skábmamánu 17. beaivvi, Helssegis.
Duogáš miellačájáhussii lea go sámediggeláhka Suomabealde ii leat vel loktejuvvon riikkabeaivái gieđahallamii.
– Sámit leat gillán ilgadis politihkalaš spealu dihte seammás go min buolva gártá suokkardit, makkár vejolašvuođat Sámedikkis leat ceavzit boahttevuođas, muitala Suoma Sámi Nuorat -searvvi ságadoalli, Petra Laiti dieđáhusas sosiála mediaid bokte.
Miellačájáhus galgá leat Suoma riikabeaiviesu ovddabealde.
Mannan vahku muitalii Laiti Ávvirii ahte jus láhka ii loktejuvvo riikabeaivái, de dat šaddá jo goalmmát ráđđehus mii ii nagot oažžut sámediggelága Suoma parlamentii gieđahallamii.
Nu maiddái Sámiráđđi mannan vahku iežas cealkamušas čájehii duhtameahttunvuođa otná diliin sámediggelága olis.
Cuiggoduvvui ON dásis
Suopma cuiggoduvvui Ovttastuvvon Našuvnnaid (ON) dásis 2019:s das go riika rihkku sámiid olmmošvuoigatvuođaid ja rivttiid.
Suoma sámediggelága evttohus galgá geigejuvvot Suoma riikkabeaivái maŋimustá skábmamánu 17. beaivvi, vai lága gerget ođasmahttit dán ráđđehusbáji áigge.
