Romssa duopmogirkus ságastallet ja suokkardallet man láhkai soabahanproseassa galgá láhčit hávskes boahtteáiggi sámi ja kveana ođđa buolvvaide.
Duohtavuođa- ja soabahankommišuvdna geigii raportta Stuoradiggái geassemánu 1. beaivvi. Vahkku maŋŋel, geassemánu 7. beaivvi diibmu 19.00, bovde Romssa duopmogirku, UiT Norgga árktalaš universitehta ja Sámi dearvvašvuođadutkama guovddáš (SDDG) konsertii ja panelaságastallamii.
Fáddán leat Duohtavuođa- ja soabahankommišuvnna árvalusat soabahanbargui. Panelaságastallamis jerret maid dál ja mo galgá soabahanproseassa láhčit hávskes boahtteáiggi sámi ja kveana ođđa buolvvaide? Makkár hástalusaid ferte čoavdit ovdal go olahit soabahallama ja makkár vuordámušat leat sámi ja kveana servodagain?
Romssa duopmoproavasgotti duopmoproavás Stig Lægdene jođiha panelaságastallama. Oasseváldit leat NSR nuoraid jođiheaddji Elle Márgget Nystad, Norske kveners forbund jođiheaddji Kai Petter Johansen, Sámi dearvvašvuođadutkama guovddáža jođiheaddji Ann Ragnhild Broderstad ja Kirkelig utdanningssenter nord 1. amanueansa Tore Johnsen. Norgga árktalaš universitehta prorektor Kathrine Tveiterås ja Duohtavuođa- ja soabahankommišuvnna láhttu ja emeritus bisma Per Oskar Kjølaas čoahkkáigeassiba ságastallama.
Frank Jørstad, Agnete Saba ja Kristin Mellem ovttas Annimari Pelliin guoimmuhit dáiddalaš ovdanbuktimiiguin.
