Boahtte lávvordaga, geassemánu 11. beaivvi, lágidit Lujávrris Guoládatnjárggas jo 31. gearddi doaluid maid gohčodit Geasseriepmun.
Boahtte lávvordaga, geassemánu 11. beaivvi, lágidit Lujávrris Guoládatnjárggas jo 31. gearddi doaluid maid gohčodit Geasseriepmun.
– Geasseriemut šadde ovtta ládje Lujávrri suohkana dovdomearkan ja seammás oassin suohkana kultureallimis, čállet lágideaddjit preassadieđáhusastis.
Lágideaddjin lea Lujávrri čearddalaš kulturguovddáš ovttas Murmánska guovllu stáhta álgoálbmotguovddážiin. Vuosttaš háve doalut lágiduvvojedje 1985:s. Dan rájes lágidit jahkásaččat.
Valáštallan ja kultuvra guovddážis
Lágideaddjit čállet iežaset preassadieđáhusas ahte Geasseriemuin lea valáštallama ja kultuvrra seaguhus.
– Buot festiválaguossit vurdet miellagiddevaččat sihke valáštallan- ja kulturprográmma mii lea vuođđoduvvon sámi árbevirloaš eallinvuohkái ja kultuvrii.
Prográmmas leat báhčin dávggiin, njoarostangilvvut, viehkan oktan soppiin, suhkangilvvut, sámi spábbačiekčan ja eará gilvvut.
– Sámi spábbačiekčan geasuha oallugiid
Earenomážin ja geasuheaddjin lágideddjiid mielas lea sámi spábbačiekčan, man čikčet dábálaččat nissonolbmot beare. Čikčet ge spáppain mii lea dahkkon duoljis.
– Sámi spábbačiekčamii lea lohpi dušše nissonolbmuin searvat. Nissoniin leat badjelis gáktelágan biktasat, ja dása sáhttet searvat nissonat vaikko man agis ja hámis. Ieš čiekčan ii bistte eambbo go oktiibuot 20 minuhta.
Govven: Sergey Gavrilov
