Riddu Riđđu bovde sámi ja eará eamiálbmotfilbmadahkkiid sáddet iežaset buktagiid festivála oanehisfilbmaprográmmii.
«Open call» -prográmmii lea vejolaš sáddet filmmaid iešguđet šáŋŋeriin, muhto filmmat eai galgga bistit guhkit go 30 minuhta. Riddu Riđđu ohcá filmmaid main eamiálbmogat ieža gaskkustit iežaset muitalusaid.
– Mis lea beroštupmi čájehit filmmaid main eamiálbmogat leat sihke ovddabealde ja maŋábealde kámera. Filbma sáhttá áinnas muhtin eamiálbmoga gillii go filmmat galget tekstejuvvot eŋgelasgillii, čállá festivála preassadieđáhusas.
Riddu Riđđu máksá čájehanbuhtadusa filmmaid ovddas mat válljejuvvojit filbmaprográmmii.
Sávvá oažžut olu ohcamušaid
Riddu Riđu festiválajođiheaddji Sajje Solbakk lea gealdegasas ja sávvá ahte oččoše buori responssa.
– Riddu Riđđu leamaš ja lea erenomáš arena sámi dáidagii ja kultuvrii. «Open call» -ortnet lea addán fantásttalaš filbmaprošeavttaid mat áŋgiruššet sihke min ja gehččiid. Sámis leat olu hutkás taleanttat, ja danin sávvat ge ahte olu filbmadahkkit váldet oktavuođa ja ohcet čájehit iežaset filmmaid festiválas, lohká son.
«Open call» ohcanáigemearri dievvá cuoŋománu 3. beaivve 2023:s. Riddu Riđu neahttasiidduin gávdnojit eanet dieđut dán ja ohcama birra.
