Čakčamánu 10. beaivi lea Iešsorbmeneastadeami máilmmibeaivvi.
Beaivvi čalmmustahttin dáhpáhuvvá sámedikki girjerádjosis Kárášjogas, dibmu 10.00 rájes diibmu 11.00 rádjái.
– Sámediggeráđđi háliida váikkuhit dasa ahte unnidit stigmatiserema, botket tabuid ja lasihit dihtomielalašvuođa ja máhtu iešsorbmema birra. Mii háliidit bidjat fokusa dasa ahte iešsorbmen lea stuora servodatváttisvuohta, maiddái dáppe Sámis, dadjá sámediggeráđđi Runar Myrnes Balto (NSR) preassadieđáhusas.
Čalmmustahttima oktavuođas doallá sámediggeráđđi Runar Myrnes Balto apealla, ja sii ceggejit giitevašvuođamuoraid maidda guossit besset heaŋgut lihpuid maidda leat čállán juoidá man dihte sii leat giitevaččat.
– Mii maiddái cahkkehit gintaliid muitun sidjiide geat leat guođđán min, ja midjiide servodahkan, čállá Sámediggi.
Guossit ávžžuhuvvojit coggat ala, dahje buktit mielde juoidá mas lea oránša ivdni, mii lea almmolaš ivdni mii geavahuvvo beaivvi čalmmustahttimii.
