Troms Kraft ja Ymber čađahit fápmo- ja industriijaovdánahttinvejolašvuođaguorahallama Davvi-Romssas. Dan oktavuođas bovdejit álbmotčoahkkimiidda gos muitalit maid dássážii leat gávnnahan vejolašvuođaguorahallamis. Olbmot ožžot maid vejolašvuođa muitalit maid oaivvildit dán oktavuođas.
Mannan čavčča álggahedje Troms Kraft ja Ymber fápmo- ja industriijaovdánahttinvejolašvuođaguorahallama Davvi-Romssas. Dan čađahit danin go háliidit gulahallat guovllu ássiiguin ja boazodolliiguin ovdal go mearridit lea go vejolašvuohta dahje gosa livččii vejolašvuohta ásahit bieggamilluid ja industriija.
Dál bovdejuvvojit Omasvuona, Gáivuona, Ráissa ja Návuona ássiid álbmotčoahkkimiidda.
– Mii bovdet buohkaid geat háliidit eanet dieđuid dan barggu birra mii dássážii lea čađahuvvon. Troms Kraft ja Ymber čilgejit manin vejolašvuođaguorahallan álggahuvvui ja maid dássážii leat gávnnahan. Álbmotčoahkkimiin besset olbmot muitalit iežaset oaiviliid, lohká prošeaktajođiheaddji Geir Håvard Hanssen.
Iešguđetge oaivilat
Troms Kraft ja Ymber sávvet ahte oallugat bohtet álbmotčoahkkimiidda.
– El-fápmodilálašvuohta lea dehálaš fáddá ja olbmuin leat iešguđetge oaivilat dan ektui mo galggašii buvttadit eanet el-fámu. Danin sávvat ahte oallugat bohtet ja muitalit maid oaivvildit dan ektui, lohká Hanssen.
Norgga čázádat- ja energiijadirektoráhta ja Statnett iskkadeamit čájehit ahte jus ođasmahtti energiijageavaheapmi lassána Davvi-Norggas, de nohká fápmobadjebáza. Jus de gártat importeret el-rávnnji Ruoŧas ja muđui Eurohpás, de divru el-rávdnji maiddái Davvi-Norggas. Danin livččii áigumuššan gávnnahit man láhkai sáhttá dán guovllus buvttadit el-fámu, čállá Troms Kraft iežaset neahttasiidduin.
Vaikke guovllus čađahit vejolašvuođaguorahallama, de fertejit fápmofitnodagat čuovvut dábálaš gáibádusaid jus háliidit ohcat ásahit fápmobuvttadeami. Dat mielddisbuktá earret eará ahte suohkanstivrrat fertejit doarjut fápmoprošeavttaid ja guovllus ferte dahkkot váikkuhusárvvoštallan.
Álbmotčoahkkimat
Návuonas lágiduvvo álbmotčoahkkin Návuonbađa giliviesus odne, vuossárgga 13.02.23, diibmu 17.30-20.30.
Ráissas lágiduvvo álbmotčoahkkin Kirkebakken searvegoddeviesus ihttin, maŋŋebárgga 14.02.23, diibmu 17.30-20.30.
Gáivuonas lágiduvvo álbmotčoahkkin Davvi álbmogiid guovddážis, Olmmáivákkis, gaskavahkku 15.02.23, diibmu 17.30-20.30.
Omasvuonas lágiduvvo álbmotčoahkkin Ivguvuona servodatviesus, duorastaga 16.02.23, diibmu 17.30-20.30.
