Geassemánu loahpas šaddet «osku», «girku», «duohtavuohta», «buorideapmi» ja «nuppástuhttin» earenoamážit guovddážis go Norgga girku Sámi girkoráđđi lágida Troandimis riikkaidgaskasaš álgoálbmotkonferánssa.
Geassemánu loahpas šaddet «osku», «girku», «duohtavuohta», «buorideapmi» ja «nuppástuhttin» earenoamážit guovddážis go Norgga girku Sámi girkoráđđi lágida Troandimis riikkaidgaskasaš álgoálbmotkonferánssa.
– Hállat duođai historjjá birra hástalit jaskatvuođa, diehtemeahttunvuođa ja biehttaleami mii ain gávdno álgoálbmogiid ja eanetlogu álbmogiid gaskkas ollu sajiin máilmmis, dadjá Tore Johnsen, gii lea Sámi girkoráđi váldočálli ja lea ge konferánssa lágideami ovddasvástideaddji go jođiha Girkuid máilmmiráđi álgoálbmotreferánsajoavkku.
Ovttas Girkuid máilmmiráđiin lágida Sámi girkoráđđi riikkaidgaskasaš konferánssa álgoálbmogiid ja soabahusproseassaid birra geassemánu 20. – 21.b. 2016. Konferánssa namma lea «Reconciliation Processes and Indigenous Peoples: Truth, Healing and Transformation». Konferánssa lágideamis leat mielde maiddái Ruoŧa girku, Sámiráđđi, Suoma Evangelalaš-lutherlaš girku Sámebargguid ráđđadállagoddi ja Girkolaš oahpahusguovddáš davvin.
– Álgoálbmotkonferánsa lágiduvvo dan oktavuođas go Girkuid máilmmiráđi Guovddášlávdegoddi čoahkkana Troandimii geassemánu 22. – 28.b, čilge Tore Johnsen.
Koloniseren ja vealaheapmi ain váikkuhit
Maŋimuš jagiid leat leamaš konkrehta soabahusproseassat álgoálbmogiid ja eanetlohkoálbmogiid gaskkas máŋgga sajis máilmmis. Seammás lea koloniserema ja vealaheami historjjás ain váikkuhus sihke álgoálbmogiidda ja eanetlohkoálbmogiidda.
– Dát dahká soabahusa áššáiguoskevaš beallin go lea sáhka sosiálalaš nuppástusproseassain álgoálbmogiid ja eanetlohkoálbmogiid gaskkas, dadjá Johnsen.
Konferánsa čalmmustahttá duohtavuođa, buorideami ja nuppástuhttima juohkelágán soabahusa váldočuokkisin, ja deattuha kristtalaš girkuid earenoamáš ovddasvástádusa ja sajádaga dákkár oktavuođain.
– Konferánsa lea mielde nannemis ekumenalaš álgoálbmotfierpmádaga ja čuvge sisdoalu Girkuid máilmmeráđi váldofáttás 2021 rádjái, muitala Tore Johnsen.
Logaldallit miehtá máilmmi ja Mari Boine
Konferánssa ságastalliid searvvis leat earret eará Victoria Tauli-Corpuz, ON álgoálbmotvuoigatvuođaid earenoamášraportevra, Marie Wilson, Kanada Duohtavuođa- ja soabahuskommišuvnna lahttu, Miguel Salanic, Latiinnaamerihkálaš girkuid ráđi álgoálbmotkoordináhtor.
– Konferánsaprográmmas lea maiddái čájálmas mas leaba mielde Mari Boine ja oskkoldathistorjjádutki Brita Pollan geat galgaba lohkat 1700-logu miššuvdnamuitalusaid osiid musihka lassin, lohká Tore Johnsen
Dáhpáhus lea rabas buot berošteddjiide ja lea vejolaš dieđihit cuoŋománu 7. beaivvi rájes. Eambbo dieđuid konferánsa birra logát dás.
