Guolástanministtar áigu digaštallat geatnegasvuođasystema, ja bovde álbmotčoahkkimii Romsii dan birra.
Guolástanministtar Per Sandberg háliida juohkit dieđuid geatnegasvuođasystema birra guolástanealáhusas.
Álbmotčoahkkimis Norgga Guolástanallaskuvllas, Romssas, lea odne dat fáddán, gos son maid áigu digaštallat fáttá. Dan dieđiha Ealáhus- ja guolástandepartemeantta preassadieđáhusas.
– Sávan ahte sáhttit digaštallat fáktavuđolaččat. Mun galggan čilget manne ráđđehusa evttohus váldit eret geatnegasvuođaid, nanne Davvi-Norgga. Lea ovttaoaivilvuohta ahte geatnegasvuođasystema mii dál lea, ii leat ávkin Davvi-Norgii. Ráđđehusa evttohus boahtá eambbo ávkin riddoguovlluide, go dálá systema, lohká Sandberg preassadieđáhusas.
Áigu oažžut dieđuid ovdan
Sandberg galgá lágidit álbmotčoahkkimiid maiddái Hámmárfeasttas, Várggáin ja Melbus, ja háliidivččii miessemánus daid lágidit.
– Ráđđehus háliida oadjebas bargosajiid guolástanealáhusas. De dárbbašit gánnáhahtti mearabiebmoindustriija, ja min evttohus nanne dan. Mun vuhtii válddán ahte buohkat eai leat ovttaoaivilis dasa, muhto sávan álbmotčoahkkimiin oažžut buot dieđuid ovdan. Sávan oallugat bohtet čoahkkimii digaštallat dán dehálaš ášši, lohká Sandberg.
