Sámedikki bargu seailluhit ja ovddidit mearrasámiid kultuvrra joatkkašuvvá, ja dán bargui bovdejit álbmoga mielde. Odne lea álbmotčoahkkin Gáivuonas.
Maŋimuš jagiid lea ráđđehus rievdadallan guolástuspolitihka, ja dán geažil lea Sámediggi masá juohke dievasčoahkkimis gieđahallan guolástusáššiid. Boahtte dievasčoahkkimis lea maiddái guolásteapmi fáddán, go dalle pláne sámediggeráđđi Silje Karine Muotka ovdanbuktit ođđa mearrasámi strategiija.
Čalmmustahttit vejolašvuođaid
Ovdal go Muotka sáhttá ovddidit mearrasámi strategiija, de dáhtu gulahallat mearrasápmelaččaiguin. Odne lágida Sámediggi nuppi álbmotčoahkkima, dán vuoru čoahkkanit Davvi Álbmoga guovddážii Olmmáivákkis Gáivuonas.
– Mii dáhtut seailluhit ja ovddidit mearrasámiid guolástusealáhusa, mii áigut čalmmustahttit sin vejolašvuođaid seammás go politihkalaččat ain čoavdit hástalusaid. Dán barggus lea dehálaš gulahallat olbmuiguin geain leat jurdagat mo ovddida ealáhusa, čilge Muotka. Ovdalaččas leamaš álbmotčoahkkin Girenjárggas Álttás ja boahtte mánu álggus lea čoahkkin Deanus.
Álbmot veahkkin
Otná álbmotčoahkkima ulbmil lea gulahallat ja ságastallat man láhkai sáhttá seailluhit ja ovddidit ássama ja ealáhusaid mearrasámi guovlluin. Mearrasámi strategiijas lea guolásteapmi stuorámus oassin ja danin šaddá maiddái sáhka vuotnalinjjá, vuotnaguolásteami bivdo- ja guolledustehaga vejolašvuođaid birra ja mearrasámiid guolástusvuoigatvuođaid birra.
Ođđa fámut ja mokta
Sámediggeráđđi Silje Karine Muotka muitala ahte mearrasámi strategiija galgá leat áigeguovdil, ja das galget buorit árvalusat. Son ii jáhke nu olu guolásteddjiid ollet álbmotčoahkkimii go dát lágiduvvo buoremus bivdoáigodagas. Muotka bovde dattege buohkaid váldit oktavuođa jus sis leat jurdagat boahtte áiggi birra.
– Sávaldat strategiijan lea loktet miela ja addit ođđa fámuid, čilge son.
