Dam vuođđudus juohká jahkásaččat 50 miljovnna kruvnna boarrásat olbmuide geaidda njoammudávdda eastadandoaimmat čuhcet.
Borgemánu loahpa rájes lei vejolaš ohcat ruđaid vuođđudusas, muhto lea ain vejolaš eaktodáhtolaš servviide ohcat ruđaid prográmma bokte. Ruđaid maid ohcá, galget mannat boares olbmuide ja sin oapmahaččaide geaidda njoammudávddaeastadandoaimmat čuhcet. Digitála ja fysalaš deaivvadanbáikkit, guosseskihpár bálvalusat ja sosiála ovttastallan leat doaimmat maid Dam vuođđudus vuoruha iežaset prográmmas «Aktivitetsprogrammet», čállet preassadieđáhusas.
– Njoammuneastadandoaimmat leat olu boares olbmuide čuohcan hui garrasit. Danin ávžžuhat mii buohkaid, geain lea buorre hutkkus mo sáhtášii eastadit sierraássama ja oktonasvuođa boares olbmuid gaskkas. Gulahala minguin dahje eaktodáhtolaš servviin iežat lagas birrasis mo sáhtášit ohcat prošeaktaruđaid, lohká Dam vuođđudusa váldočálli, Hans Christian Lillehagen.
Stuorradiggi lea juolludan Aktivitetsprogrammetii 400 miljovnna kruvnna ođasmahtton nationála bušeahtas. Dam vuođđudus lea Dearvvašvuođadirektoráhtas ožžon bargun juohkit 50 miljovnna kruvnna eaktodáhtolaš organisašuvnnaid prošeavttaide. Fylkkamánnit leat juo juohkán daid 350 miljon kruvnna. Manná eanemusat guokte vahkku ovdalgo oažžu vástádusa. Eambbo dieđut: Dam.no
