Duojáriid Ealáhussearvi lea botken šiehtadallamiid Sámedikkiin.
Sámediggi ja Duojáriid Ealáhussearvi (DES) lea šiehtadallame duodje ealáhusšiehtadusa boahtte jahkái, muhto leat dál botken šiehtadallamiid. Sii čállet preassadieđáhusas ahte sii eai vásit ahte dat leat duohta šiehtadallamat, go Sámediggi ii váldde vuhtii gáibádusaid maid DES lea buktán. DES lea buktán gáibádusaid mat galget ovddidit ja loktet duoji ealáhussan. Sámediggi ieš bidjá doaibmabijuid šiehtadussii mat eai leat namuhuvvon ealáhusain.
Eai vuorut loktet ja ovdánahttet ealáhusa
Sii maid čállet ahte lea váttis oažžut Sámedikki váldit vuhtii doaibmabijuid mat lea njulgejuvvon ealáhussii, ja dainna lágiin eai oaččo duojárat vejolašvuođa loktet ja ovdánahttit ealáhusa.
– Sámediggi bidjet ruđa šiehtadussii geahčadit duodjeealáhusa organiserema, okta ášši maid plenum lea bargame, muhto duodjeealáhus ii leat bivdán dan sin gáibádusain, čállá DES stivrajođiheaddji Marit Guttorm Graven preassadieđáhusas.
Sámediggi ii váldde vuhtii
Guttorm Graven maid čállá ahte seamma dahkkui váldošiehtadusain, go lea biddjon ruhta geahččat soahpamuša. Son joatká muitaleames ahte ealáhus lea bivdán čielggadeami gávnnaheames movt ja geainna sáhttá olgguldas ovttasbargan leat, várrendihte duodjeealáhusa buoremus lági mielde, muhto dat ii váldon vuhtii.
– Dat lea máŋga čuoggá njulgejuvvon doaibmabijuid ealáhusovdáneami vuostá gáibádusain, maid duodjesearvvit leat addán Sámediggái, muhto Sámediggi ii áiggo miehtat masa ge mii lea dehálaš duodjeservviide, čállá Guttorm Graven.
Duodjeruđas badjebáza juohke jagi
– Dasa lassin vásiha duodjeealáhus ahte juohke jagi lea badjebáza mii geavahuvvo eará ulbmiliidda go duodji, haga ahte duodjesearvvit leat beassan mielde váikkuhit dan. Ja dan vaikko čuoččo váldošiehtadusas ahte duodjesearvvit galget leat mielde váikkuheames masa ruhta mii, ii leat geavahuvvon, galgá geavahuvvot, čállá Guttorm Graven preassadieđáhusas.
Loahpalaččat oaivvilda DES ahte dál lea Sámediggi čavgen gáibádusaid prošeavttaide, ja dat mielddisbuktá ahte duodjefitnodagat fertejit eanet ruhtadit go ovdal. Dat daddjo ahte duodjeealáhus ferte váldit stuorat ekonomalaš ovddasvástádusa ealáhusa ovdáneapmái. Dat ollislaš rámma ealáhusšiehtadusas gáržžiduvvo juohke jagi, loahpaha DES preassadieđáhusas.
