Bearjadaga gullogoahtá «Sameradiopodda» – sátta mii čuvgesta váttis fáttáid sámi birrasis nu go HBTQ, vuolledábi áššiide, seksuálaovttastallama ja iešsoardimiid Sámis.
Bearjadaga gullogoahtá «Sameradiopodda» – sátta mii čuvgesta váttis fáttáid sámi birrasis nu go HBTQ, vuolledábi áššiide, seksuálaovttastallama ja iešsoardimiid Sámis.
Olbmo eallimat leat boktán beroštumi ja Monica Anderson lohká álo leamaš dehálažžan hupmat filtariid haga.
Dál jođiha prográmma ovttas Merethe Kuhmuneniin.
– Mun vuohtán ahte Sámis lea jávohiskultuvra muhtin fáttáin, mii báidná min. Dá lea mu vuohki cuvket dan jávohisvuođa, lohká Merethe Kuhmunen.
Duohta ivnnit
Vuosttaš oasis gulat čálitkeahtes njuolggadusaid ja norpmaid birra Sámis. Juohke oasis muitaluvvojit garra vásáhusat fáttá birra ja de lea digaštallan.
Ovtta oasis lea Natalia Carrion mielde, gii ovddit jagi almmuhii skearru.
Son muitala hehttehusaid birra maid vásihii joatkkaskuvllas, ja movt dat áigi hábmii su.
Rahčan oažžut mearkka
Eará oasážis beasat gullat áddakelaš buohccidivššára Erick Naeseliusa birra. Go lei 17-jahkásaš de fárrii Stockholbmii gos son gávnnai ráhkisvuođa Andersiin.
Soai álggiiga doarrut rievtti nalde oažžut boazomearkka.
– Mun jáhkán ahte dát proseassa livččii álkit jus livččen heterofiila ja jus mus livččii eamit ii ge dievdobeallálaš, lohká Naeselius.
Sameradiopodda almmuhuvvo juohke bearjadaga diibmu 12:s. Sáddagiid gávnnat appas Sveriges Radio Play dahje doppe gos gávnnat poddasáddagiid. Vuosttaš 11 oasážiin lea namma «Duohta ivnnit».
Poddaverddežat
Merethe lea 27-jahkásaš ja lea Sudjáváris eret, ja gullá Geagganvuomi boazodoallobearrašii. Son ráhkista bussáid. Ráhkista leat hutkájin ja beassat eret vuordámušaiguin, nu go dahká duoji bokte.
Go lei 21-jahkásaš, de bargagođii Sverige Radio Sameradionis ja lea dan rájes bargan radios. Dál orru Uppsalas iežas morsiin.
Monica lea 29-jahkásaš ja lea Bierkes eret. Son lea maid bajásšaddan boazodoallobearrašis Upmeje Tjeälddies. Boazodoallu lea álo su váimmu lagamusas, vaikko dál orru Örebros gos heasttat leat guovddážis.
Son lea álo gesson máinnaslaš eallimii go nuorran guđii mánnávuođaruovttu vai beassá snowboardain čierastallat ja vásihit ođđa beliid máilmmis.
