Diibmá álggahii Marit Inga Sara Pettersen ruhtačoaggima, doarjun dihte Jovsset Ante Sara ášši. Dál galgá ášši Hålogalándda lágamánniriektái, ja Sara Pettersen lea fas bosádan heakka ruhtačoaggimii.
Dan vahkku lea Jovsset Ante Sara boazolohku ášši Hålogalándda lágamánnirievttis. Son ii dohkkehan eiseválddiid mearrádusa, unnidit ealu 75 heggii, ja stevdnii stáda.
Diibmá son vuittii Sis-Finnmárkku diggegottis, muhto stáhta guoddalii. Disdaga álgá diggi lágamánnirievttis, ja bistá golbma beaivvi.
Marit Inga Sara Pettersen álggahii diibmá ruhtačoaggima Jovsset Antii. Ruhtačoaggin lea ain dál jođus.
– Dál leat álgán olbmot fas sáddet ruđa, mun álggahin ruhtačoaggima mannan dálvvi, ja bođii badjelaš 30 000 ruvnno, lohká Marit Inga.
Bosádit heakka
Son čilge ahte ii leat maŋemuš áiggi leamaš nu aktiiva ruhtačoaggimis.
Dál go ášši galgá fas diggái, áiggui fas bosádit heakka dasa.
– Ulbmil dáinna lea veahkehit Jovsset Ante gokčat áššegoluid, ja buot eará goluid mat sus leat dán ášši oktavuođas. Čájehit ahte doarjut su, jus eat fysalaččat leat Romssas čuovvume dikki, de goit ge doarjut ekonomalaččat, lohká ruhtačoaggima álggaheaddji.
Son lohká ahte jus Jovsset Ante Sara vuoitá lágamánnirievttis, de lea sáhka leamaš máksit ruđaid fas ruovttoluotta.
– Dat lea maid Jovsset Ante háliida. Son lea leamaš hui vuollegaš, dovdo ahte ii leat hárjánan váldit vuostá dákkáriid. Son lea hirbmat giitevaš, muhto dieđusge son sávvá ahte ii boađe atnu dáidda ruđaide, ja sávvá ahte vuoitá, muitala Marit Inga.
– Lea leamaš maid sáhka skeŋket ruđa muhtin lágádussii mii bargá sullasaš áššiiguin, jus ii šatta atnu ruđaide.
Seamma ládje go Ruoŧas
Doarjja lea boahtán olggobeale Norgga rájiid maid, Ruoŧabeale leat maid olbmot sádden ruđa. Marit Inga muitala ahte leat buot lágan olbmot geat dorjot.
– Leat dieđusge olu badjeolbmot, muhto leat dáluolbmot ja dáru olbmot maid. Lea somá go nu olusat dorjot, lohká son.
Sara Pettersen čilge ahte son ii beasa ieš vuolgit čuovvut dikki Romsii, vaikko livčče miella.
Barggu geažil ferte son Álttás čuovvut dikki, nu bures go sáhttá.
– Mun hástalan eambbosiid doarjut, vuolgit čuovvut dikki, muhto ruđalaččat maid. Jurddašan ahte mii galggašeimmet nu go Ruoŧabeale leat čoahkkanan jus leat makkárge stuimmit, seamma ládje galggašeimmet mii ge dahkat!
Buohtastahttit dábálaš ealáhusain maid
Sara Pettersen čilge ahte son áŋgiruššá dán áššis, danne go su mielas lea olles ášši nu boastut. Sus ja su isidis lea fitnodat Álttás, soai vuovdiba earret eará geađgešilttaid.
Son buohtastahttá ášši sudno fitnodagain, jus stáhta bággešii sudno unnidit gálvojođu.
– Jovsset Ante lea maid ealáhusdoallu, gii deavdá rehketdoalu nu go buohkat earát, ja nu guhka go su doaibma lea lobálaš, de lea ártet go stáhta nu garrasit viggá bágget su unnidit ealu. Sáhttá buohtastahttit dábálaš ealáhusain maid. Danne mun áiggun doarjut, ja čájehit ahte dán ii sáhte dohkkehit, lohká Sara Pettersen.
– Áinnas ávžžuhan olbmuid váldit muinna oktavuođa jus áigot doarjut, jurddašan vuorraset olbmuid, geain ii soaitte Vipps dahje neahttabáŋkku, lohká Marit Inga Sara Pettersen.
– Duođašta boasttuvuođa mii lea dahkkon
Ávvir humiha Jovsset Ante Sarain eahkeda ovdal go diggi galgá álgit.
– Dat lea hui issoras. Sávvamis manná bures.
Sara mielas lea buorre go olusat dorjot, ja lohká ahte ruhta boahtá buorrin maŋŋil, jus šaddá áin mannát viidásit áššiin diggevuogádagas. Son ii oainne ahte doarjja lea njuolgut sutnje.
– Mu mielas duođašta doarjja ahte álbmot dovdá ahte lea boasttuvuohta dahkkon. Mus šaddá dovdu ahte sámi álbmot ii dohkket dákkár meannudeami. In mun geahča ahte doarjja lea njuolgut munnje, muhto ahte leat vuostá stáda meannudeami boazodoalus.
Dáiddaprográmma olles vahkku
Jovsset Ante Sara oabba Maret Anne Sara lea čohkken olu dáiddáriid Romsii. Sii galget olles vahkku čalmmustahttit Jovsset Ante ášši, Pile o’Sápmi dáiddaprográmmain.
– Oappá áŋgiruššama čađa lea issoras olu doarjja. Mu mielas orru rievttes buorre, go dáidda nagoda čalmmustahttit dan mii geavvá, soaitá vel buorebut čalmmustahttit go hupmamiin, loahpaha Jovsset Ante Sara.
