Norgalaččat borre eanet maniid 2018:s go ovddit jagi.
Diibmá buvttaduvvo 70 700 tonna mani ja dat vástida 13,3 kilo mani juohke norgalačča nammii.
Nu čájehit Eanadoalu bušeahttalávdegotti gaskaboddosaš logut.
– Gaskamearálaččat deaddá manni 63 grámma ja dat mearkkaša ahte juohke norgalaš lea borran 211 mani diibmá, dadjá Statistihkalaš guovddášdoaimmahaga opmodaga-, areála- ja vuođđoealáhusaid ossodaga Anne Ingun Løvberget.
Eanet manit ja vuoncát
Maŋimuš jagiid leat norgalaččat borran eanet maniid ja dalle dieđusge lassánit maiddái vuoncát ja návetdoalut gos buvttadit maniid.
– Mis leat masá 2200 eanadoallofitnodaga gos masá 4,5 miljovnna vuoncá buvttadedje maniid. vuoncát ja návetdoalut leat lassánan juohke jagi 2011 rájes, dadjá Løvberget.
Juohke vuonccis guoddá badjel 300 mani jahkái.
Ekologalaš manit
Eanet norgalaččat dáhtot maiddái borrat ekologalaš maniid.
– Masá 10 proseantta maniin maid vuvde Norgga borramušbuvddain 2018 ledje ekologalačča. Logi jagis leat ekologalaš manit lassánan beliin, dadjá Løvberget.
