Borga heađušta johtolaga sihke geainnuid alde ja áimmus Romssas vuossárgga. E6-geainnu alde leat 10-15 gálvobiilla darvánan ja Romssa girdišiljus leat máŋga girdi maŋŋonan.
Borga heađušta johtolaga sihke geainnuid alde ja áimmus Romssas vuossárgga. E6-geainnu alde leat 10-15 gálvobiilla darvánan ja Romssa girdišiljus leat máŋga girdi maŋŋonan.
Davvi-Norgga Dálkedieđáhusa mielde lea Romssas muohttán 30 sentte maŋimuš jándora, ja dát lea dagahan ahte iđida rájes leat leamaš stuorra hástalusat johtolagas.
Čieža biilla seamma lihkohisvuođas
Iđitdiimmuid ledje máŋga bártti, earret eará Langnesbakkenis, gos olles čieža biilla ledje johtolatlihkohisvuođas, dás lihkus ii roasmmehuvvan, oktage čállá Nordlys.
Máŋga gálvobiilla leat maid bártidan beaivvi mielde. Muhtimat leat darvánan, earát ges beaškkehan oktii earáiguin ja muhtimat ges vuodján badjel geainnu.
Maiddái máŋga personbiilla leat vuodján badjel geainnu ja bártidan gálljin.
Politiijat eai nagot buohkaid bálvalit
Olu biilavuoddjit leat riŋgen politiijaide go leat bártidan geainnuid alde.
– Mii eat nagot buohkaid bálvalit, ja leat vaikke man olusat vuordimin. Mis lea eambbo go doarvái bargu, dadjá Romssa politiijaguovllu operašuvdnajođiheaddji Kåre Munkvoll Nordlysii.
13-áigge dieđihedje politiijat ahte 10-15 gálvobiilla leat darvánan Brandvollbakkenii Salangsdalenis. Politiijat ledje dalle jođus báikái.
Girdit maŋŋonan
Muohtadálki ráhkada maid moivvi Romssa girdišiljus, sihke SAS, Widerøe ja FlyViking girdit leat leamaš sakka maŋŋonan.
Maiddái bussejohtolat lea maŋŋonan garrasit.
(©NTB)
