Maŋimuš beivviid lea valjis muohttán Romssa fylkkas, ja dál váruhuvvo stuora uđasvárra.
Romssa fylkkas lea valjis muohttán maŋimuš jándoriid ja olbmot leat šaddan olu muohttaga čorget.
Dápmotvuovddis, Báhcavuonas, borggai mehterbeali jándoris mannan vahkkoloahpa ja Romssa gávpogis ges lea boahtán 61 centimehtera muohta maŋimuš golmma jándoris.
Romssas lea 158 centimehtera muohta, ja mannan ija borggai 29 centimehtera. Ná olu muohta ii leamaš cuoŋománu 1. beaivvi jagi 2000 ja 1997 rájes, čállá Nordlys.
Uđasvárra
Olu muohta ja bivvalat dagahit ahte lea stuora uđasvárra.
Varsom.no neahttabáiki váruha 4. gráda uđasvára sihke Romsii, Ivgui ja Helgelándii.
Uđasvárra mihtiduvvo viđa grádas.
Davvi-Norggas lea maiddái stuora uđasvárra Oarje-Finnmárkkus ja miehtá Romssa ja Nordlándda.