Sávzzaid lohku, mat leat duođaštuvvon vahágahtton boraspiriide borgemánu vuosttaš beaivái, lea uhccit go diimmá logut. Váldosivva loguid njiedjamii lea go eai leamaš nu olu gumpevahágat.
– Boraspirevahágahtton sávzzaid lohku rievdá lunddolaččat jagis jahkái. Lea illudahtti go vahágat leat njiedjan, vaikko maiddái dán jagi leat sávzaeaiggádat vásihan olu vahágiid, lohká Birasdirektoráhta direktevra Ellen Hambro preassadieđáhusas.
Stáhta Luonddubearráigeahčus (SLB) lea ovddasvástádus iskat gaikkoduvvon ja jápmán sávzzaid go ballet ahte boraspiret leat vahágahttán ealli. Vahágat, mat dieđihuvvojit jahkásaččat borgemánu vuosttaš beaivái, leat dálá govva mii addá buori áddejumi mo vahátlohku rievdá.
Borgemánu vuosttaš beaivvi rádjái ledje dieđihuvvon 1521 vahágahtton dahje jápmán sávzza maidda navdet boraspire leat sivalažžan. Das leat 573 sávzza vahágahtton dahje goddon boraspiriide, čájehit SLB iskamat. Dat lea uhcit go diimmá logut ja sullii seamma go ovddit maŋimuš jagiid.
– Dat leat gaskaboddosaš lohku 01.08.2024. Dávjá lávejit stuorámus guovža- ja geatkevahágahttimat leat borgemánus ja čakčamánus. Mii vuordit loguid rievdat dás ovdosguvlui, lohká Hambro.
Eanet dieđuid gávdná dás Rovbase.no.
