Lea earálágan boradanboddu mii lágiduvvo bearjadaga Romssa universitehtas, go boradanbottus besset olbmot gullat eambbo Britta Marakatt-Labba dáidagiid birra.
Davvi-Norgga Dáiddamusea kuráhtor Charis Gullickson muitala Britta Marakatt-Labba dáidaga birra man universitehta eaiggáduššá.
– Beasat gullat Marakatt-Labba muitaleaddji ja miellalági dáiddamáilmmi birra. Su dáiddavuohki lea ovddemusat broderenhámis ja lea muitaleaddji. Son addá eallima motiivvaide sámi historjjás, mytologiijas ja árgabeaivvis, dakkár vugiin mii botke konvenšuvnnaid ja stereotyhpaid mat leat sámi dáidagis, kultuvrras ja identitehtas, čilgejuvvo UiT preassadieđáhusas.
UiT oamasta máŋga dáidaga maid Britta Marakatt Labba lea ráhkadan, ja oasi dáidagis leat luoikan Davvi-Norgga Dáiddamuseii universitehta 50-jagi ávvudeami oktavuođas. Bearjadaga diibmu 12:s, boradanbottus, lágiduvvo dáiddalunša Britta Marakatt-Labba dáidaga birra.
Stuorimus dáiddačoakkáldat Norggas
UiT Norgga árktalaš universitehta ii leat dušše báiki gos lea dutkan ja logaldallan. Dáidda almmolaš lanjas (KORO) dahká campusa stuora dáiddagalleriijan, mas čuođi dáiddára leat ráhkadan 350 dáidaga.
– Dieđuid mielde galgá UiT:s leat stuorimus dáiddačoakkáldat buot Norgga universitehtain, ja nubbin stuorimus sámi dáiddačoakkáldat, muitala KORO diehtojuohkki Ellen Marie Fodstad.
Lassin dán 350 dáidagii, gávdnojit olu dáidagat maid UiT lea skeaŋkkas ožžon, ja maiddái dáidda maid iešguđet fakultehtat ja instituhtat leat oastán áiggiid mielde.
Boktit beroštumi dáidagii
UiT ja dáidda ávvuprošeavttain áigot čalmmustahttit ja loktet osiid dan dáidagis.
Juohke vahkku almmuhuvvo okta dáidda, mánnosaččat lágiduvvo dáiddaboradanboddu, dáidagat mat eai leat registrerejuvvon galget kártejuvvot, ja UiT ođđa visttis, mii rahppo fargga, galgá dáidda čalmmustahttot.
– UiT:s lea stuora čoakkáldat mas lea buorre kvalitehta ja mii sávvat olbmuid bisánastit ja geahččat daid. Mii jáhkkit beroštumi boktit mii buktá digaštallamiid, lohká Fodstad.
