– Diibmu 13.17 odne, bearjadaga cuoŋománu 5. beaivvi, riŋgii muhtin dievdu Kárášjoga ráđđevissui bombaáitagiin, dieđihedje Finnmárkku politiijat Twitteris.
Politiijat dieđihedje veahá maŋelaš ahte diibmu 13.31 váldui várohuvvon dievdu gitta iežas ásodagas.
Dievdu lea oahpis politiijaide ja váldo mielde gažadeapmái.
Diibmu 15.00 ii lean politiijaid operašuvdnahoavda olámuttos kommenteret ášši.
iFinnmark aviisii leat politiijat lohkan ahte leat gažadeamen albmá.
– Boađán bombet olles vistti
Kárášjoga ráđđeolmmái lohká nagodan gurret ráđđeviesu vuollel 15 minuhtas go soames dievdu ringii ja áittii bombbain bávkalit ráđđeviesu.
Ráđđeolmmái Kurt Maurstad lohká iežaset váldán hui duođalaččat bombaáitaga.
Álggos lohká lohkkadan uvssaid ja dieđihan politiijaide áitaga.
– Dan dagaimet vai ii beasa sisa. Ii dan dieđe goasse makkár olmmoš lea ovddidan áitagiid, ahte lea go albma vai mii, muhto mii váldit álot dákkár dáhpáhusaid duođalažžan, lohká Maurstad.
Dan maŋŋel lohká iežaset gurren olles ráđđeviesu.
Juste dalle ledje barggus 23 olbmo.
– Ádjáneimmet gurret dálu vuollel 15 minuhtas. Leimmet čoahkkanan biillaid bisánanbáikái olggobeallái, go politiijain bođii diehtu ahte leat váldán gitta olbmo gii áittii bombet, muitala ráđđeolmmái.
Geahpádus go váldui gitta
Govven: Josef Isak Utsi
Son lohká leamaš stuorra geahpádussan, go oaččui politiijain dieđu ahte dievdu lea váldon gitta.
– Dalle diđiimet ahte dál ii sáhte šat boahtit, nu go lei áitán, muitala Maurstad.
– Áiggui sátnejođiheddjiin hupmat
Ráđđeolmmái muitala ahte dat olmmoš lei álggos ringen go áiggui sátnejođiheddjiin hupmat, muhto son ii lean juste dalle báikkis.
– Maŋŋel ringii go de ovddidii áitága. Mun lean dieđihan dáhpáhusa sihke sátnejođiheaddjái, gii lea mátkkis, ja maiddái várresátnejođiheaddjái, gii bođii maŋŋel ráđđevissui, muitala Maurstad.
Bargi suorganan
Kurt Maurstad muitala bargi suorganan garrasit gii vástidii telefovnna go dievdu áittii bombba bávkalit ráđđeviesus.
Son lohká iežaset váldit vára dál dan bargis ja dieđus maid eará bargiin.
– Son lea suorganan, ja dan maid leat eará bargit, muitala Maurstad.
Odne, bearjadaga diibmu 14.30, doalai Maurstad čoahkkima bargiiguin juohkin dihte dieđuid, ja vai besset dan birra hupmat.
– Muhto maiddái geahččat movt doaimmai evakueren ja doaimmat maid bijaimet johtui go bombaáitta bođii, muitala Maurstad.
