-Almmuhus-
OĐĐASATBohte menddo maŋŋit

Bohte menddo maŋŋit

-

-

Ii jándora ge ovdal go JSL ja Bb vuolláičáliiga ulbmilšiehtadusa ovttasbarggu birra, geahččaledje Olgešbellodat, Gurutbellodat ja SáL fállat Anders S. Buljoi sátnejođiheaddjeámmáha.

Ikte čielggai ahte Bargiidbellodat ja Johttisápmelaččaid Listu leat soahpan ovttasbargat boahttevaš áigodagas ja Johan Vasara šaddá Guovdageainnu ođđa sátnejođiheaddjin.

Muhto dán geahččaledje muhtimat bissehit; Olgešbellodat, Gurutbellodat ja Sámeálbmot Listu geahččaledje oainnat fállat ovttasbarggu Johttisápmelaččaid Listtuin (JSL).

 

Njálmmálaš fálaldat

Dán joavkkus leat oktiibuot vihtta áirasa, nu livčče sii, ovttas JSL:in, ožžon eanetlogu suohkanstivrras logiin áirasiin.

Anders S. Buljo duođašta dán joavkku váldán singuin oktavuođa.

– Juo, dat gal lea duohta, muhto sin ovttasbargofálaldat ii boahtán ii jándora ge ovdal go vuolláičáliimet šiehtadusa Bargiidbellodagain, čilge Buljo.

Buljo muitala ahte fálaldat bođii njálmmálaččat, muhto ahte lei earret eará sáhka maiddái addit sátnejođiheaddjeámmáha sutnje.

 

Bohte menddo maŋŋit

Johttisápmelaččaid Listu liikká válljii joatkit šiehtadallat Bargiidbellodagain:

– Mii duođalaččat árvvoštalaimet «viđeš-joavkku» fálaldaga, muhto mii leimmet dalle jo ollen nu guhkás proseassas Bargiidbellodagain, leimmet duhtavaččat das mo min politihkka ovdanboahtá go singuin ovttasbargat ja leimmet liikogoahtán dán ovttasbargui nu bures jo. Danne válljiimet joatkit Bargiidbellodagain šiehtadallat, čilge Buljo.

 

– Dát bellodagat mat fálle ovttasbarggu leat leamaš oalle mielas ruvkkiide, lei go das mihkkege dadjamušaid go válljiidet hilgut sin?

– Juo, dat lei dehálaš midjiide. Muhto «viđeš-joavku» gal lei jorggihan dán áššis ja lohke iežaset sáhttit čuovvut ja dohkkehit JSL ruvkepolitihka, man lei hui somá gullat, vástida Buljo.

 

– Somá go háliidit ovttasbarggu

Buljo lea ilus go bellodagat válde suinna oktavuođa.

– Vaikke eat válljen singuin šiehtadit, de lei somá go háliidit ovttasbarggu ja mii sávvat buori ovttasbarggu suohkanstivrras. Dál lea dehálaš ahte suohkanstivra geassigoahtá seamma guvlui, danne sávan ahte suohkanstivrras šaddá buorre gulahallan boahttevaš áigodaga, lohká Buljo.

 

Ihtá báberáviissas beasat lohkat ges Bargiidbellodaga ja Johttisápmelaččaid listu šiehtadusa birra.

 

-Almmuhus-