Eai leat vel nagodan bissehit buollima. Bargiid gal leat ožžon sihkarvuhtii.
Bohkanrusttet, mainna leat bohkame bávtti Skarvbergtunnelen davábealde Porsáŋggus Finnmárkkus, lea buollime. NRK dieđuid mielde eai lean iđđes vel nagodan jáddadit buollima.
Bohkanrusttet lea anus ođđa tuneallaprošeavttas davábealde dálá Skarvbergtunealla Eurohpágeainnus 69 Davvinjárgga guvlui.
Álggahedje bargguid gaskavahku
Koronaeastadandoaimmaid geažil fertejedje gaskkalduhttit bargguid doppe, muhto gaskavahku álge fas bargat ođđa tuneallain. Politiijat dieđihit ahte bargit leat beassan dearvan eret buollimis ja leat sihkarvuođas, muhto leat olu várálaš gásat ja golgi ávdnasat vuorkátealttás gos buollái.
– Várálaš golgi ávdnasat sáhttet viidudit buollima, dadjá Finnmárkku politiijaid operašuvdnajođiheaddji Eirik Pedersen NRK:i. Sii ballet rusttegiid ja eambbo tealttáid sáhttit buollát.
Buollinčáskadeaddjit báikkis
Buollinčáskadanveahka lea dál báikkis hutkame movt galget hehttet buollima viidumis. sihke Porsáŋggu ja Davvinjárgga čáskadanveagat leat boahtán báikái máŋggain biillain.
– Mii doalahit buori sihkarvuođagaskka, eat ge sádde ovttage lahka ovdal go lea kontrolla dán dilis. Dál leat guorahallame dán dáhpáhusa, dadjá Fred Ole Holmen 110- guovddážis.
Geaidnu rahppon
Guđa áigge iđđes dat giddejuvvui E69 geaidnu Sittarvuona bokte Leaibevuona ja Honnesvági gaskkas, muhto geaidnu lea fas rahppon dál, muitala Stáhta geaidnodoaimmahat.
NRK dieđuid mielde lea 600 njealjádasmehtera stuoru tealtá buollán visot.
