Hoaŋkabealjit čiŋahit ja čieruhit. Nu juoiggada John Máhtte. Jurddahan nu duohta sánit, vaiko sus soaitá leamaš eará jurdda dajahusaiguin go mus.
Mu jurdagat jorret dajahusain dan boazodoalu eallinlági masa eallima vurbbiin riegadeimmet. Masa min maŋisboahttit maid leat riegádan. Min máttuid eallin, min eallin, min maŋisbohttiid eallin ja sávvamis boahtteáigi.
Čiŋahit…čiŋahit fal sihke árgabeaivvis sielu, bivttasčiŋaiguin ja máŋgga earaládje.
Giđđat go boazojahkki álgá, go čoavjjet njunne davás, áldu njoalosta rukses miesi julggiid ala, ođđa lassi min opmodahkii. Dan dovddu diehtá boazoeaiggát ja ii máhte sániiguin čilget.
Giđđageasi návddaša varas rahtta. Vuoibmuda dálvvi maŋŋel.
Geasset ja čakčageasi lávddada rásseeatnamiid davvin, ja bálggada čuoikabiiggás. Miessemearkumis iežas miesi iežas merkii vajastit. Nu somá álo. Erenoamážit mánnái gii vuosttaš miesi oažžu ja mii álggaha su eallovuođu.
Čakčat guopparmáilmmis assu dálveládje. Gávpái gesso boazu ja diehtit die lea min eallinláibi.
Skábman lullivumiid herveda ja veahá hilbbohallá.
Dálvet lávddadit jeageleatnamiin.
Giđđadálvvi váccaša, čuolada čearggaid, davásguvlui fiellada.
Min árbejuvvon eallin, min ealáhus, min beaiveláibi. Čiŋaha ja illudahttá.
Dalle ii muitte váivviid, čieruheami, vašuheami go ealloravddas lea.
Ahkkitvuođa ja čieruheami eahpevuoiggalaš meannudeamis.
Cielaheapmi, vašuheapmi, váimmusoardima.
Manin? Manin jearan mun? Manin galgat mii dárbbahit vásihit čieruheami iežamet árbejuvvon eallinlágis? Olmmošriekti dat lea mis maid eallit diekkár vašuhemiid haga.
Lea šaddan beaivválaš vásáhus oaidnit sosiála mediain, eará mediain ja arenain, man bahádahkkit, gávnneheamit, giellásat ja gearjideaddjit mii leat. Mii, geat dušše bargat iežamet ealáhusain nu go earát barget iežaset bargguid gos dal de.
Leat go jurdilan man gierdevaččat mii galgat leat? Leatgo jurdilan makkár dovdu badjána boazoeaiggadii, leatgo jurdilan makkar jurdagat min mánáin leat go dákkáriid oidnet? Leatgo jurdilan movt min vuorasolbmuide lea oaidnit ja gullat dákkáriid.
Ja gii veahkeha min? Gii addá jeđđejeaddji sániid midjiide? Gii čujuha preassadieđáhusas ahte dát ii leat dohkalaš? Gii? Mun jearan…
