Boazosápmelaš gii lei dieđihuvvon láhppon Láhpis, gávdnui jápmán odne diibmu 12.
– Seaking helikopter gávnnai su diibmu 12:s, son lei dan guovllus gos lei áidumin, muitala operašuvdnajođiheaddji Jan Olav Shjølberg Ávvirii.
Almmái dieđihuvvui jávkan maŋŋil go ii lean leamaš fitnemis ságaide ievttá eahkeda rájes.
– Son lei jápmán go gávdnui, lea veadjemeahttun dadjat mii lea geavvan go son lea okto leamaš jođus, čilge Shjølberg.
Oapmahaččat lea ožžon jápmasága.
Ii leat vástidan telefuvnna
Árabus odne dieđihuvvui mediaide ahte almmái galgá leat vástidan telefuvnna, muhto ii leat jietnadan maidege. Dát dattege eai leat rivttes dieđut.
– Dat lei dušše juoga maid jáhkiimet. Čájehuvvo ahte lea leamaš muhtinlágan teknihkalaš sivva mii dagahii ahte sáhttá orrut dego ahte livččii vástidan telefuvnna, vaikke ii leat dan dahkan, čilge Shjølberg.
Dieđihuvvui jávkan
Oarje-Finnmárkku politiijaguovllus dieđihedje Twittera bokte mánnodaga diibmu 10.30-áiggi ahte boazosápmelaš lea dieđihuvvon láhppon.
– Son lea ikte maŋŋelgaskabeaivvi juo vuolgán meahccái. Eai leat ožžon suinna oktavuođa eahkeda rájes, čálle politiijat.
Váldogádjunguovddáš sáddii helikoptera ohcat dán olbmo.
Bartaeaiggát dieđihii
Operašunjođiheaddji Jan-Olav Schjølberg dajai iFinnmark aviisii ahte muhtin bartaeaiggát dat dieđihii sidjiide dievddu birra go ii lean ožžon su ságaide ievttá eahkeda rájes.
Politiijat leat maid geahččalan oažžut suinna oktavuođa.
Ohcet áideguora
Davvi-Norgga váldogádjunguovddáža gádjunjođiheaddji Alf Hågensen logai ges Altaposten aviisii ahte helikopter lea birrasiid beal ovtta áigge dán guovllus ja guovllus galgá leat fiertu ja buorre ohcandálki.
– Dievdu galggai divodit boazoáiddi, ja mii ohcat vuos áideguora. Leat ožžon buori čilgehusa gokko áidi lea ja mii ohcagoahtit doppe, dajai Hågensen aviisii.
Dievddus lea eallu dán guovllus gos lea dieđihuvvon láhppon. Politiijat čállet dát lea Láhpis.
Operašuvdnajođiheaddji Jan Olav Schjøberg muitala Ávvirii ahte almmái lei vácci mannan meahccái.
Ávvir čuovvu ášši.
