Ikte go boazopolitiijat ledje dutkamin boazosuoládeami de gávnnahalle maiddái eará vearredahkkit.
Ikte go boazopolitiijat ledje dutkamin boazosuoládeami de gávnnahalle maiddái eará vearredahkkit.
Joahkonjárgga boazodoallit gávdne sotnabeaivvi maŋŋilgaskabeaivvi njuovvansaji man váide politiijaide. Báikkis gávdnui bohcco oaivi ja guomočoavji, bealjit ledje čuhppon eret, nu navdet ge dan leat suoládeapmin.
Orohaga ovdaolmmoš Isak A. Buljo, ii loga iežas diehtit nu olu dán birra go ii leat ieš leamaš meahcis. Son dattege duođašta Mierovári guovllus, davábeale Mierona, gávdnon njuovvansaji ja leat váidán ášši politiijaide.
– Mii eat dieđe gean lea boazu. Dat lea heittot go suoládit, dat lea dáhpáhuvvan ovdal orrot dakkárat mat vudjet doppe lobi haga, lohká Buljo.
Ii navdde eará boazodolliid dahkan dán
Son ii loga iežas háliidit spekuleret ahte gii sáhttá njuovvan bohcco.
– In jáhke bivdiid leamaš, inge jáhke eará boazodolliid leamaš go eai hal dat vuoje gal olbmuid ealo siste. Fertejit politiijat ohcat ja jus gávdnet suollagiid de almma sis leat lágat maid mielde stivrejit, lohká Buljo.
Buljo ii loga iežaset dávjá vásihit boazosuolavuođa, muhto lohká gullan ahte ránnjáorohat bártida dákkáriid dihte eanet.
Boazopolitiijat fitne dutkamin njuovvansaji ikte, muitala Boazopolitiija politiijabálvá Bjarte Takvam.
– Boazodoallit fuomášedje dán sotnabeaivvi veaigin, go fuomášedje ahte lottit girddašedje ja ledje čoahkkanan báikái. Muhto dalle dálkkáskii ja sii šadde oalle guhká ohcat ovdal go gávdne njuovvansaji nu ahte besse dieđihit midjiide, muitala Takvam.
Dutket viidásat
Takvam lohká leat váttisin dutkat ášši go muohttán lea.
– Vuodjinluottat leat borgan, muhto mii geahččalat gávdnat luođaid ja nu ain. Dál dutkat ášši viidásat, muitala Takvam.
Gávnnahalle lobálaš mađiijaid olggobealde
Muhto ii boazopolitiijaid bargu nohkan diesa, go vulge njuovvansajis eret de fuomášedje njealjejuvllatvudjjiid.
– Mii bisseheimmet vuddjiid. Sii ledje olggobeale lobálaš mađiijaid ja ledje aitto guođđán sihkkeliid ja vázzilan meahccái go galge rievssatbivdiid, čilge Takvam.
Priváhtagovva: Rávdná Buljo
Bivdit ledje ieža muitalan politiijaide ahte leat láigohan sihkkeliid.
– Sis ii orron diehtu das ahte gos lea lohpi vuodjit ja gos ii. Muđuid gal ledje báhpirat ortnegis ja bivdoeriid ledje maid čuvvon. Mii sáhkkoheimmet bivdiid lobihis bievlavuodjin ovddas, muitala Takvam.
