Dál lea Eanandoallo– ja biebmodepartemeanta sádden gulaskuddamii Boazodoallolága 60. paragráfa rievdadanevttohusa mas áigot addit válddi Fylkkamánnii mearridit boazologuid siidaosiide.
Dál lea Eanandoallo– ja biebmodepartemeanta sádden gulaskuddamii Boazodoallolága 60. paragráfa rievdadanevttohusa mas áigot addit válddi Fylkkamánnii mearridit boazologuid siidaosiide.
Ávvir čálii dán birra sullii guokte vahku dás ovdal, ahte stáhta áigu «galmmihit» boazologuid viđa jahkái.
Dál lea ge departemeanta sádden láhkarievdadeami evttohusa gulaskuddamii. Ođđa eanandoallo- ja biebmoministtar Jon Georg Dale oaidná dárbbu rievdadit boazologu vai láhkafámuin nagodit easttadit ahte boazologut eai fas laskka Finnmárkkus.
– Lea leamaš ádjás bargu unnidit ealuid guohtumiid ektui, dan dássái mii lea doaibmanjuolggadusaide mearriduvvon. Lea hui dehálaš ahte boahtteáiggis doalahuvvo ekologalaš ceavzilis boazodoallu, dadjá stáhtaráđđi Jon Georg Dale.
Dása bohte dalle juo reakšuvnnat go Ávvir čálii láhkaevttohusa birra. Earret eará dajai Guovdageainnu Johttisápmelaččaid Searvvi jođiheaddji Nils Mathis Sara, ahte go stáhtii addo váldi mearridit bajimus boazologuid siidaosiid dássái, de dat boahtá ráhkadit moivvi joavkkuid, siiddaid, vieljažiid ja oappážiid gaskii.
Hehttet boazologuid laskama
Eanaš siidaoasit Finnmárkkus leat ge njuovvan mearriduvvon boazologuide, nu ahte dál áigu ge departemeanta addit Fylkkamánnii válddi mearridit viđa jahkái juohke siidaoassái daid boazologuid máid 2012 leat mearridan.
– Fertet bidjat doaimmaid mat hehttejit boazologuid ovdánit gosa eat hálit. Dát evttohus máid dál ovddidat boazodoalloláhkii boahtá easttadit boazologuid laskama, ja mii easttada ráfehisvuođaid ja riidduid, dadjá Dale.
Juogadit boazologuid
Gulaskuddandokumeanttas boahtá ovdan ođđa bealli, man birra ii leat gullon, namalassii ahte guokte dahje eambbo siidaoasit sáhttet maid juogadit gaskaneaset boazologuid, siskkobealde daid loguid máid eiseválddit leat sidjiide mearridan.
Sámediggi ja Norgga Boazosápmelaččaid Riikasearvi leat ráđđádallan dán ášši juovlamánu álggus.
Sámedikki stuorámus opposišuvnna bellodaga áirras, Marianne Wollmann Magga, moittii garrasit evttohusa dalle go beakkehii Ávviris. Son dajai earret eará ahte dát lea seamma go máhccat «lappefogden» áigái.
11 siidaoasi sáhkohallan
Kárášjogas ja Guovdageainnus leat ge 11 siidaoasi geat leat ožžon sáhkuid go eai leat unnidan boazologuid mearriduvvon loguide.
Ávvir lea dán rádjái jearahan guokte siidaoasi geat leat sáhkohallan, ja čuovvolit dađis eambbosiid, gullan dihte makkár oainnut sis lea ráŋggáštemiide máid stáhta dál vuojeha sin vuostá.
Ihttá báberáviissas muitala goalmmát dán 11 olbmos, iežas jurdagiid birra.
