-Almmuhus-
OĐĐASAT– Boazodoalus eai leat rekruterenváttisvuođat

– Boazodoalus eai leat rekruterenváttisvuođat

-

-

Eanadoallo- ja biebmoministtar Bård Hoksrud lea mannan vahkkus čoahkkinastán Norgga Boazosápmelaččaid Riikkaservviin (NBR).

– Olu eará ealáhusaid ektui eai leat boazodoalus rekruterenváttisvuođat, muitalii  NBR-jođiheaddji  Ellinor Marita Jåma go deaivvadii ministariin čállá Ráđđehus preassadieđáhusas.

 

Eanet nuorat geat háliidit bargat

Boazodoallu lea dan erenoamáš dilis ahte leat eanet nuorat geat háliidit bargat boazodoalus go geaidda lea sadji, muitalii Jåma stáhtaráđđái.

Son maid deattuhii ahte boazodoallu lea kultur- ja bearašvuđot ealáhus.

– Boazodoallu lea eanet go ealáhus. Lea eallinvuohki. Jus leat riegádan boazodollui, de dat čuovvu du olles eallima, dajai Ellinor Marita Jåma, ja lasihii ahte boazodoalodilli ja hástalusat leat iešguđetláganat riikka iešguđet osiin.

 

Ávkkálaš deaivvadit NBR:in

Čoahkkimis digaštalle earret eará dáid áššiid: Boazodoalloláhka, boazodoallošiehtadusa šiehtadusat, boazodolliid psykososiála bealit, norgga-ruoŧa guohtonkonvenšuvdna, boraspirepolitihkka, areálahálddašeapmi, ja boazoáiddit Nordlánda-bánas.

– Lea hirbmat ávkkálaš munnje deaivvadit NBR-ovddasteddjiiguin ja geahčadit áššiid main sii beroštit, dadjá eanadoallo- ja biebmoministtar Bård Hoksrud, guhte illuda eambbo ovttasbargat boazodoalloealáhusain.

-Almmuhus-