-Almmuhus-
OĐĐASATBoazodoalu boahtte áigi ii vuorjašuhte eiseválddiid

Boazodoalu boahtte áigi ii vuorjašuhte eiseválddiid

-

-

Vaikke sisabahkkemat ja garra stivrejupmi baldá badjeolbmuid ja Sámedikki, de oaivvildit njunuš eiseválddit ahte boazodoallu lea rievttes bálgás.

Lágat rivdet ja ođđa njuolggadusat masá gildet badjeolbmuid bargamis bohccuiguin nu go ovddit buolvvat leat dahkat.

Čohkolaga boazodoaloorohaga ovdaolmmoš Johan Aslak Logje ballá ahte árbevirolaš boazodoallu jávká go stáda ain rievdada lágaid mat geanehuhttet badjeolbmuid.

Guovddáš eiseválddit oaivvildit ahte doaibmabijut leat dárbbašlačča boazodoalu boahtte áigái.

 

Ii váivašuva

Boazodoaloealáhusa ovddasvástideaddji lea eanandoallo- ja biebmodepartemeantta. Eiseválddit lohket ealáhusas čuvges boahtte áiggi.

 – Boazodoalu boahtte áigi gal ii vuorjašuhtte mu. Rievttes doaibmabijuiguin sihkkarastit boazodoalu, ja mii leat jo rievttes guvlui lávken. Eanaš guovlluin lea boazolohku ekologalaš gánnehahtti. Gánnehahtti resursageavaheapmi nanne ealáhusa ekonomalaččat maid, lohká Eanandoallo- ja biebmodepartemeantta stádačálli Terje Halleland.

 

Eanandoallo- ja biebmodepartemeantta stádačálli Terje Halleland. Preassagovva: Torbjørn Tandberg

 

Váldet vuhtii kulturárbbi

Sámediggi váivašuvvá go eiseválddit dušše čalmmustuhttet ekologalaš ja ekonomalaš gánnihahttivuođa.

Sámediggeráđđi Silje Karine Muotka dadjá Ávvirii ahte eiseválddiid niehku orro rievdadit árbevirolaš boazodoalu nu ahte doaimmašii dego eanandoallu, kulturárbbi eai oro áigumin oba nannet ge. Dán šiitá stádačálli.

 – Fámolat ekonomiija addá buoret kulturvuođu. Dalle lea boazodoaloservodagas vejolašvuohta bisuhit bearašstruktuvrra, giela ja eará dehálašvuođaid, dadjá Halleland.

 

Dáhtot čáhkkehit saji

Sisabahkkemat leat šaddan oassin boazodolliid árgabeaivin.

Beaivválaččat golahit badjeolbmot olu áiggi, návccaid ja ruđaid dáistaleapmái.

Eiseválddit lohket dehálažžan suddjet boazodoalu, muhto dattege ferte eará ealáhusaide čáhkket saji.

 – Eará ealáhusat maid galget ovdánit ja dárbbašit areálaid, muhto seammás galgá vuhtiiváldit boazodoalu dárbbuid. Danin čuožžilit hástalusat. Lea dehálaš áigá gulahallagoahtit vai nagodivččiimet goappašat beliid duhtadit, lohká stádačálli.

 

Dehálaš ráđđádallat

Eanandoallo- ja biebmodepartemeantta lea bargamin ođđa Stuorradiggedieđáhusain boazodoalu birra.

Dan olis čuovvu eanandoallo- ja biebmoministtar Jon Georg Dale Sámedikki dievasčoahkkima boahtte vahkkus.

 – Son searvá digaštallamiidda ja háliida gullat makkár oainnut Sámedikkepolitihkkáriin leat boazodoalu birra. Ráđđádallamat sihke Sámedikkiin ja Norgga Boazosápmelaččaid Riikkaservviin leat hui dehálačča boazodoaloáššiiguin, muhto seammás in sáhte gal dadjat man láhkai sin oainnut deattuhuvvojit Stuorradiggedieđáhusas, loahpaha stádačálli Terje Halleland.

-Almmuhus-