(NTB): Boazodoalli Arvid Jåma muitala ahte boazodoallit Fovsenis masset goalmmádasoasi dálveguohtuneatnamiin go huksegohtet bieggamillorusttega Fovsensullui. ZERO ges illuda go šaddá bieggamillohuksen.
(NTB): Boazodoalli Arvid Jåma muitala ahte boazodoallit Fovsenis masset goalmmádasoasi dálveguohtuneatnamiin go huksegohtet bieggamillorusttega Fovsensullui. ZERO ges illuda go šaddá bieggamillohuksen.
Disdaga čielggai ahte Statkraft, Trønderenergi ja Nordic Wind Power DA ovttas huksejit Eurohpá stuorimus bieggamillirusttega mii lea gáttis Gaska-Norggas. Olles doaibma máksá 11 miljárdda ruvnno.
Boazodoalli Arvid Jåma lea máŋggaid jagiid vuosttaldan bieggamillohuksemiid, ja gohčoda dan vuoigatvuođarihkkumin sihke boazodollui ja Fovsen-Njaarke sijte boazoeaiggádiidda Lulli-Sámis, čállá Fosna-Folket.
– Mun lean beahtahallan servvodahkii, go badjelgehččet unnitálbmoga nu fasttit. Dál leat vuorjan min máŋggaid jagiid dáinna mearrádusain, ja jus ovttasge lea dárbu suohkanlaš dearvvašvuođabálvalusaide, de lea mis dárbu daidda, lohká Jåma aviisii.
ZERO illuda
Bieggamillohuksen lea buorre ođas sidjiide geat beroštit dálkkádagas.
– Dát lea illubeaivi go dál viimmat šaddá ođasmahtti el-rávdnji. Mis leat leamaš guhkes áiggit go unnán lea dáhpáhuvvan bieggafámuin, ja dál viimmat luovvanišgoahtá, dadjá ZERO beaivválaš jođiheaddji Marius Holm preassadieđáhusas.
Luonddugáhttenlihttu lea beahtahallan
Luonddugáhttenlihttu moaitá maid bieggamillohuksema, mii galgá gárvánit 2020:s, ja mas galget leat 278 turbiinna.
– Dá lea okta dain stuorimus luondduverrošemiin Trøndelágas ođđasit áiggis. Luondu billahuvvá garrasit, ja dát lea dehálaš guovlu lullisámiid boazodoalus. Mii sávvat ahte dát bargu ii šatta duohtan, muitala Luonddugáhttenlihtu jođiheaddji Lars Haltbrekken NRK:ii. (©NTB)
