-Almmuhus-
-Almmuhus-
-Almmuhus-
OĐĐASATBoazodoalli bážii boazoborri beatnaga

Boazodoalli bážii boazoborri beatnaga

-

-

Ikte eahkedis boazodoalli Johan Ivvár Gaup šattai báhčit Nuorta-Sibirjá laika-mállet beatnaga mii oaguhii čorraga. Beanaeaiggádat leaba suopmelaččat, geat dáhpáhusa oktavuođas maiddái leigga rihkkon mohtorjohtolatlága.

Guokte suopmelačča leigga vuodján dábálaš biillain oaggunmátkái Njárgajávrái, nuortadavábeallái Máze, muitala boazopolitiija vuosttašbálvá Torbjørn Berg.

Suopmelaččat muitaleigga politiijaide ahte leigga Facebooka bokte gávdnan báikki gosa vuolgit oaggut.

 – Soai oinniiga Facebookas gova duon jávrris ja vulggiiga dohko. Eaba goddán nu ollu guliid gal doppe. Fárus lei ge beana, Nuorta-Sibirjá laika.

 

– Stuorra vahát

Beana, mii lei guollebivdiid fárus, oaguhišgođii čorraga. Boazoeaiggát fertii báhčit beatnaga. Bážii beatnaga ealu siste.

 – Stuorra vahát boazodoallái go šattai goddit bohcco danne go beana lei gáskkašan álddu. Miesi gal geahččalii gádjut, muitala boazopolitiija vuosttašbálvá Torbjørn Berg.

 

– Divrras dáhpáhus

Boazopolitiija vuosttašbálvvá Torbjørn Berg dieđuid mielde dahke boazoeaiggát ja suopmelaččat šiehtadusa.

 – Sii leat ieža šiehtadan buhtadusa ektui. Muđui lea divrras dáhpáhus daidda suopmelaččaide, ja go beatnaga vel massiiga.

Dasa lassin suopmelaččat leaba rihkkon johtolatlága go leaba vuodján ATV luoddaráigge dábálaš biillain, suopmelaččat leaba maid hilgon beanaveaddingáibádusa. Dáid ovddas leaba sáhkkohallan.

 

– Eaba boahtán šiehtadallamii

Orohaga 23A, Válgenjárgga, boazodoalli Johan Ivvár Gaup duođašta ahte lea šiehtadan buhtadusa suopmelaččaiguin, muhto soaitá fertet bargat eará ládje.

– Mii galggaimet odne deaivvadit logi áigge ovdalgaskabeaivvi Guovdageainnus, muhto soai eaba dihtton, eaba ge vástit telefovnna. Sihkkarit leaba jo vuoddján Supmii.

Johan Ivvár Gaup ii loga vuollánit das go eaba boahtán.

 – Mun ferten čállit dieđu sudnuide, ja vuosttažettiin jearrat sudnos manne soai eaba boahtán nu mo leimmet šiehttan, ja mo ovddos guvlui. Sádden rehkega, ja jus dat eaba mávsse, de šattan politiijaid bokte mannat dieđus ge. Jus dalle ii gullo šat mihkkege, de politiijat váldet oktavuođa Suoma politiijaiguin. Eará in dieđe, lohká son.


Johan Ivvar Gaup. Vuorkágovva. Govven: Marit Elin Kemi

 

Earenoamáš ášši

Politiija registrere juohke jagi moadde sullasaš ášši. Torbjørn Berg dieđuid mielde ii leat nu áigá go beana báhččui eará sajis, Suoidneleavššis, muhto dát dáhpáhus lei earálágan.

 – Earenoamáš dan áššis lea go guokte Suoma stáhtaboargára leigga vuodján badjelaš miilla oaggut áibbas makkár ge mihtu haga ja makkár ge oaivila haga.

Boazodoalli ii loga vásihit dávjá dakkár dáhpáhusaid go beana oaguha sin orohagas ealu, muhto dattetge lohká leamaš ovdal dat nai.

 – Ii leat dávjá. Ovddit jagi gal sihkkarit beatnagat ledje ealu siste dan dihte go ledje hui ollu bohccot mat ledje hávváduvvan. Orru čájeheame ahte lei beana mii lei gáskkašan bohccuid, go čeabehis ja čoarbbealis ledje hávit, muitala Johan Ivvár Gaup.

 

 

 

 

 

 

-Almmuhus-