Olleš čora vuojáhalai Reihvágis. Dáhpáhus galgá geavvan maŋemus jándoris.
Olleš čora vuojáhalai Reihvágis. Dáhpáhus galgá geavvan maŋemus jándoris.
Mannan ija vuojáhalle 8 bohcco Skuohtanjárgga siiddas Stranddas, Reihvági guovllus, njealje ja beallemiilla davábeale Leaibevuona Porsáŋggu gielddas. Boazodoallit geat leat leamašan báikkis, muitalit mollánan bohccuid gávdnan, ja eai ge gávdno deahkka mearkkat luottas mat čajehit ahte lea viggan goazastit.
Váldit eret vuodjinkoarta
Skuohtanjárgga boazodoalli, John Anders D. Sara, geas lei nieiddažis boazu dan čorraga siste, lohka dat lea surgadis dáhpáhus go dien mađe olu bohccot vuojáhallat oktanis.
– Ferte leat stuora lágan biila mii nie olu bohccuid vuodjá jámas, ja buot vearrámus go eai bisán ja diđoš movt bohccuiguin manai, ja maid midjiide dieđu atte politiijaid bokte. Diekkáriin galggašii vuodjinkoartta váldit eret mat nie láhttejit johtolagas, lohká eddon Sara.
Vuorkágovva
Váttis duođaštit
Boazopolitiijat ožžo dieđu ovdalaš 12.00 odne, ja leat jođus báikái. Boazopolitiija sadjásašhoavda, Inger Anita Øvergård, ii sáhte dadjat vuos áššis nu olu.
– Mii leat ožžon dieđu, ja leat maid sádden boazopolitiijabálvvá báikái. Mis eai leat nu olu dieđut áššis vuos, muhto mii geahččalit gávdnat duođaštusaid báikkis. Nu go diehtu lea midjiide boahtán, de orru leamen nu ahte lea guorbmebiila vuodján oktanis daid bohccuid. Ferten mieđihit ahte lea issoras váttis cegget ášši dákkár dáhpáhusas, jus ii leat oktage oaidnán, dahje eai gávdno duođaštusat báikkis, muitala son.
Heaittihit álot daid áššiid
Boazodoalli John Anders D. Sara lohká ahte su vásáhus lea politiijat heaittihit hui johtilit dákkár vuojáhallan áššiid. Øvergård mieđiha ahte lea dávjá nu.
– Nu go dadjen, de leat nu váddásat dákkár áššit, ahte lea dávjá nu ahte ii leat mihkkege man maŋis mii sáhttit mannat ja guorahallat ášši mii lea áibbas «čalmmehis» ášši, lohká son.
