Norggas leat veahkkálasbarggut ja eaktodáhtolašbarggut gudneskeaŋkan. Dasa mii leat ovttaoaivilis. Eaktodáhtolaš bargguid bokte oažžut sihke buoret ja fátmmasteaddji servodaga. Manne vearuhit eaktodáhtolaš servviid veahkkálasbargguid oktavuođas? Dán gal háliida Norges Bygdekvinnelag heaittihuvvot.
Eaktodáhtolaš Norga lea stuoris. Kánske stuorát go maid leat goassige jurddašan. Statistalaš guovddášdoaimmahat lea rehkenastán barggu mii iešguđet organisašuvnnain dahkko eaktodáhtolaččat, ja das čájehuvvo ahte jahkesupmi lea 142 000 ruvnno. Árvolassáneapmi dagai jagis 2018 olles 78 miljárda ruvnno. Otne ferte eaktodáhtolašbarggus máksit vearu veahkkálasbargguid oktavuođas.
Mánáid ja nuoraid astoáiggedoaimmat, valáštallandoaimmat, lávlunjoavkkut, searvadahttin ja demokratiijahuksen sorjá veahkkálasbargguin. Eaktodáhtolašbargu hukse stuorra oasi min servodagas. Liikká dovdet eaktodáhtolaš searvvit dan rašis ekonomalaš dilálašvuođa jagis jahkái. Ollu barggut čatnasit veahkkálasbargui, nugo kafea ja váffelvuovdin. Dat leatge barggut main ferte vearu máksit.
Ruđat mat bohtet káfeavuovdimis čovdet máŋga čuolmma servodagas, dat riggudahttet ja nannejit servodaga. Mo livčče jus min servodagas eai šat lágidivčče juovlabeahcefeasttaid, sosiálalaš deaivvademiid, jus eai šat hukse dollasajiid ja jus eai šat lágit doaimmaid sidjiide geat ásset okto.
Ráđđehus cealká ahte sii nannejit eaktodáhtolaš suorggi, ja dan mávssolaš servodatávkki mii ovddastuvvo. Dál lea áigi nannet organisašuvnnaid ruhtadili. Dás lea sáhka makkár servodaga mii dáhttut. Eaktodáhtolaš doaimmat dárbbašit buori ja bistevaš ravdameari mii álkida ja movttiidahttá barggu mii dahko ollu servviin.
Otne mearridit politihkkárat jahkásaččat guđemuš momsaolggosgoluid galget buhtadit. Dán dahket stáhtabušeahta bokte. Dáppe ruhtadit vissis meari oktasaččat, ja dán oasis juohkása sidjiide geat leat ohcan buhtadeami. Dás juolluduvvo eanet ruhta buhtadeapmái go maid stuorradiggi meannuda, mii mielddisbuktá ahte sii geat ohcet ožžot unnit buhtadeami. Dán ruđa viežžá stáhta fas go vearuha veahkkálasbargguid min eaktodáhtolaš servviin. Mii gohččut dán bokte Stuorradikki heaitit vearuheames eaktodáhtolaš servviid.
Dat lea áibbas čielggas ahte eaktodáhtolaš searvvit veahkehit doppe gos dárbbašit. Mii leat áibbas sihkkarat ahte mii dárbbašat ain sajiid gos deaivvadat ja dovdat oktavuođa ja dan veahki maid eaktodáhtolaččat barget.
Sin doaimmat addet buriid fálaldagaid ássiide ja váikkuhit ahte min servodat doaibmá.
