Vahkkoloahpas Ávviris lei artihkal Deanu luossanáliid birra. Artihkkala vuođđun lei čálalaš jearahallan muinna. Artihkkalis ovdanbuktet mu oaiviliid ja vástádusaid boasttuvugiin, ja oainnán dárbbašlažžan čielggadit iežan oainnu.
Artihkkala bajilčállagis celkojuvvo ahte mun bijan vuoigatvuođalaččaid sivvan, ahte Deanu luossanálit leat sakka geahppánan. Nu ii leat. Ávvir bivddii mu kommenteret čuoččuhusa, man mielde Suoma turisttat leat sivalaččat guollenáli goarideapmái. Vástádusas mun geahččalin ovdanbuktit, ahte dat lea menddo álkes čilgehus hui máŋggadáfot váttisvuhtii. Lea duohta, ahte ollu turisttat leat bivdán Suoma beale čázádagas. Seammás sálašstatistihkka čájeha, ahte báikkálaš vuoigatvuođalaččat leat goddán stuorámus oasi sállašiin. In oaivvil dainna, ahte «bijan siva báikkálaš vuoigatvuođalaččaide», muhto baicce ahte ii sáhte bidjat dušše ovtta guolásteaddjejoavkku sivalažžan.
Viidáseappot artihkkala vuolit bajilčállaga vuolde, «Stoler ikke helt på forskerne» (Ii oalle luohte dutkiide), čuoččuhuvvo ahte in leat ovttaoaivilis Luossahálddašeami dieđalaš ráđi Torbjørn Forsethain. Dan teakstabihtás ovdanbuktojuvvo, ahte ean leat ovttaoaivilis dan hárrái besset go guolásteaddjit bivdit nu ollu go áigot. Dakko sáhttá leat sáhka boasttuáddejumis. Ávvira jearaldaga vuođul Forseth orru oaivvildeamen ahte dálá soahpamuša vuođul besset guolásteaddjit guolástit nu ollu go áigot, ja dan hárrái in lean ovttaoaivilis. Lean dattetge ovttaoaivilis dan hárrái, ahte guolásteapmi ii lean nu sakka ráddjejuvvon ovdal, vaikko dalle maid ledje guolástan- ja ráfáiduhttináiggit čázádagas. In leat maid eará oaivilis go Forseth dan hárrái, ahte menddo garra guolásteapmi lea sivalaš dasa, ahte Deanu luossanálit leat geahppánan. Dasto in leat kommenteren leat go Deanu guolásteami ovddit ráddjehusat leamaš doarvái garrasat, lean dušše namuhan ahte guolástusas ledje ráddjehusat maiddái ovddit šiehtadusas.
Vástádusas čujuhan maid dasa, ahte maŋimuš jagiid lea ollu, mii orru čujuheamen dasa, ahte guolit eai ceavzze nu bures mearas. Dat boahtá ovdan Norgga ja Suoma gozihan- ja dutkanbargojoavkku stáhtusraporttas Deanučázádaga luossanáliid birra. Dat ahte guolit eai ceavzze mearas nu bures, ii leat nappo dálá dili sivvan, muhto lea fáktor, man geažil náliid ealáskahttin ádjána guhkit. Munno Forsethain sierra oainnut leat dattetge sakka liiggástallojuvvon, iige dain leat mihkkige dahkamušaid mu luohttámušain dutkiide, nu mo vuollebajilčállagis čuoččuhit.
Mu váldoberoštupmi lea dahkat maid mii sáhttit, vai ealáskahttit Deanučázádaga luossanáliid. Dan mii eat nagot, jos ii leat buorre ovttasbargu sihke dutkiid ja báikkálaš ja stáhta hálddašeami gaskkas. Oaivvildan danin, nu mo maiddái lean ovdanbuktán Deanučázádaga guolástanhálddahussii, ahte mii fertet ovttas geahččat boahtteáigái ja gávdnat čovdosiid, maiguin buoremusat ovddidit Deanučázádaga luossanáliid.
