Go luomostalla de han olmmoš govve ja filbme olu, ja juohká daid govaid stuora máilbmai. Ovdal go juohká gosage govaid, lea dehálaš čielggadit singuin geat leat govas, oaččut go juohkit.
Luomus lea dábálaš govvet, vai beassá fas geahčadit daid ja muittašit luomu. Dan maid ferte de muitit lea jearrat lobi sis geaid govve, go dakkár boasttuvuohta geavvá nu jođánit ja fuomáškeahttá.
– Lea nu álki ribahit lobi haga juohkit. Jus leat suohtastallame luomus, konsearttas, sáttogáttis, restauránttas dahje ruovttus báhkkán, ja govvestat juogo Instagrammai dahje Snapai, dadjá Tina Jerstad Tenerity fitnodagas.
Dákko manná rádji
Eai dárbbaš leat gárren- ja álásgovat mainguin rihkut lága.
– Ii leat doarvái dadjat ahte du mielas lea nu fiinna govva. Jus juogát gova muhttimiin gii ii háliit dat galgá almmuhuvvot ja juogaduvvot, de it sáhte almmuhit ja juogadit dan, itge dárbbaš gal dasá oažžut dan olbmos čilgehusage manne ii suova, dadjá Ingebrigtsen.
Son deattuha ahte dát guoska gova váldomotiivvaide. Jus válddát gova konsearttas ja duogábealde oidnojit máŋgačuođi olbmo, de it dárbbaš vázzit doppe ja jearrat juohke ovttas lobi.
Don leat mánáid ovdagovva
Lea dehálaš oahpahit mánáide maid dán.
– Jus mánát hárjánit dasa ahte jearat sis lobi ovdal go juogát ja almmuhat govaid, de sii maid ipmirdit jearrat sin olbmaiguin lobi go sii háliidit almmuhit ja juohkit govaid. Dat buoremus ovdagovva mii mánáin lea, leat don, rávisolmmoš, dadjá Tron Ingebrigtsen, Frende Forsikringa sihkkarastinhoavda.
