Muhtumin sáhttá leat nu ahte it leat ruovttus go boastabiila buktá páhka man leat diŋgon. Dánne háliida Posten geahččalit čiehkat páhka du čiegus čiehkanbáikái.
Dábálaččat fertet viežžat páhkaid boastakantuvrras, muhto dán áigge eambbosat háliidit oažžut páhka man leat interneahtas diŋgon njuolga ruoktot.
Vaikko oallugat háliidit páhka njuolga ruoktot, de eanas oassi sis eai astta čohkkát ja fáktet goas boastabiila boahtá viesu lusa.
Boasta lea dál geahččaleame čiehkat páhkaid šihttojuvvon čiehkanbáikkiide muhtin válljejuvvon ruovttuin, vaikko ii okta ge leat ruovttus.
Rievttes buktin
– Áidna rievttes boastabuktin lea buktit páhkaid ja boastta nu movt kunddar háliida oažžut páhka ja boastta. Dát boastabuktinčoavddus lea heivejuvvon min ođđaáigásaš eallimii, ja mii illudit oaidnit maid min kundarat jurddašit dán boastabuktin vuogi birra, muitala Posten Norge preassahoavda John Eckhoff.
Álkes vuohki
Norgga Boasta muitala dá lea hui álkes boastabuktinvuohki.
Viessodoalli vuosttažettiin vállje heivvolaš čiehkansaji páhkaide.
Čiehkansajit sáhttet ovdamearkka dihte leat gássa stealli alde, muhtin uvssa siskkobealde mas lea kodalohkka, dahje muhtin eará heivvolaš báiki.
Go leat gávdnan heivvolaš čiehkansaji, de manat boasta neahttasiidui, posten.no, registreret iežat ja čilget čiehkansaji.
Buorit dávisteamit
– Mii leat álgán geahččalit ná buktit páhkaid, ja leat ožžon hirbmat buriid dávistemiid. Sii, geat leat ožžon páhkaid šihtton čiehkansajiide, leat hirbmat duhtavaččat ja sin mielas lea dá sihkkaris ja álkes vuohki oažžut páhkaid ruoktot go ieža eai leat ruovttus, muitala Eckhoff
