-Almmuhus-
-Almmuhus-
-Almmuhus-
GUOIMMUHEAPMIBoaresnieida ja ránnjážat gullogohtet fas!

Boaresnieida ja ránnjážat gullogohtet fas!

-

-

Boaresnieida Kirste, eatnibárdni Morten (45), Firkkal-reaŋga ja ránnjááhkožat leat gergosat máinnastit ja guoimmuhit. Ihttin almmuhuvvo vuosttaš oassi Ávvira 2016 juovlaráiddus.

Dán jagi nugo diibmá besset Ávvira lohkkit ja guldaleaddjit čuovvut boaresnieidda Kirste ja ránnjážiid juovlamánu. 

Gitta juovlaruhttii máinnastit boaresnieida ja ránnjážat sin beaivválaš eallima birra ja dáhpáhusaid birra mat čuožžilit, sihke go lea beallalačča ozus dahje go lea juo guoibmi.

 

– Ráhkada olu heđiid 
Ráhkisvuohta, soagŋostallan, dievdduid ballu čadnot bearehaga nissonolbmuide ja balahahkesvuohta mii sáhttá čuožžilit go isit ges tuvrabovssaid mielde viimmáska viehkat, leat oasáš dáhpáhusain mat dán jagi dagahit máŋga suohttasa ja morraša ránnjážiid gaskkas.

– Min boaresnieiddas, Kirstes,  dat gal jurdda joriha jođáneappot go earáin, ja nu ráhkada ge heđiid olles gillái. Ii ge álo mana nu mo lea jurddašan, čaibmá Ávvira neahttajođiheaddji Berit Marie Lise Eira.

Son neaktá ge boaresnieidda Kirste bihtás. 

– Mun dieđusge sávan ahte min lohkkit ja guldaleaddjit liikojit dán jagáš juovlaráidui. Lea álo veahá issoras dakkár buktaga almmuhit, lasiha neahttajođiheaddji vel. 

(Ášši joatká gova vuolábealde)


NEAKTÁ BOARESNIEIDDA: Ávvira neahttajođiheaddji Berit Marie Lise Eira lohpida dán jagi maid reaškkihit Ávvira juovlaráiddu guldaleddjiid.
Govven: Kari Lisbeth Hermansen

Sávvan juovlaráidu joatká 
– Mii ráhkadeimmet diibmá vuosttaš geardde «jietnateáhtera» maid almmuheimmet avvir.no siiddus.  Dalle ii lean vuos plána ahte dát galgá joatkašuvvat nuppe jagi. Muhto go diibmá oaččuimet nu olu rámi sis geat čuvvo juovlaráiddu ja go ledje nu oallugat geat sávve ahte dán jagi boahtá joatkka juovlaráidui, de gal fertiimet garrestit ja máinnastit viidáseappot ránnjážiid birra, muitala Ávvira váldodoaimmaheaddji, Kari Lisbeth Hermansen.

 Son lea dán jagi juovlaráidui maid čállán mánusa.

 

Sávvat olbmot liikojit

– Mii bat de lea hutkat dakkáriid go mis leat duostilis, hutkás ja čeahpes olbmot doaimmahusas ja dán jagi leat mii vel viežžan moadde neavttára olggobealde juovlaráidui, lohká Hermansen. 

– Mii sávvat ahte min guldaleaddjit liikojit dán jagi juovlaráidui maid, go mii han čađat geahččalit ráhkadit buktagiid maidda Ávvira lohkkit liikojit.

Vuosttaš oasi Ávvira 2016 juovlaráiddus gulat duorastaga juovlamánu 1. beaivvi avvir.no siiddus. 

Jus háliidat diimmá juovlaráiddu guldalit, de gávnnat dan maid avvir.no siiddus «Guoimmuheami» vuolde.

-Almmuhus-