Go Guovdageainnu boaresbártniid searvi áigu dál fas ealáskahttet searvvi, de sii jurddašit stuorrát ja áigot bovdet iežaset gudnimiellahtu prinseassa Märtha Louise boahtit Guovdageidnui.
Go Guovdageainnu boaresbártniid searvi áigu dál fas ealáskahttet searvvi, de sii jurddašit stuorrát ja áigot bovdet iežaset gudnimiellahtu prinseassa Märtha Louise boahtit Guovdageidnui.
Guovdageainnu boaresbárdniid searvi álggahuvvui loahpageahčen 1990-logu, muhto sis ii leat leamaš doaibma maŋemuš jagiid.
Dál áiggoše fas ealáskahttit searvvi, ja son gii lea leamaš Boaresbártniid searvvi jođiheaddji ollesáigge, Nils Mathis Buljo, lohká dál go sin searvvi gudnemiellahttu, prinseassa Märtha Louise, šaddan siŋgelin fas, de áigot su bovdet boahtit fas Guovdageidnui.
Eŋgelskuvlla doallat
Buljo muitala sii áigot bovdet prinseassa boahtit doallat kurssa sidjiide iežas Eŋgelskuvllain.
– Mii oainnat jáhkkit veahá sámi dološ oskui ja feara masa, ja danne heivešii dákkáraš kursa hui bures min searvvi miellahtuide, lohká Buljo.
(Ášši joatká gova vuolábealde)
Vuorkágovva Johan Ante Utsi
Fas gudnemiellahttu
Buljo diehtá ahte jus galgá bovdet prinseassa, de ferte goit jahkebeali ovdal sáddet bovdehusa, ja danne jurddašit beassážiidda bovdet.
2001:s, ovdal go prinseassa Märtha Louise náitalii, de oaččui son gudnemiellahttuvuođa searvvis agibeaivái, jus ii náital.
Prinseassa Märtha Louise ja Ari Behn náitaleigga Nidarosdomenis Troanddimis miessemánu 24. beaivvi 2002:s, muhto borgemánus dán jagi, beakkehii ahte soai leaba earráneamen.
– Dál, go lea earránan, de oažžu fas gudnemiellahttuvuođa ruovttoluotta, lohká Buljo.
Prinseassa riŋgii
Buljo muitala sii eai beassan dalle, go maŋemus prinseassa lei Guovdageainnus, geiget sutnje gudnemiellahttodiploma, muhto prinseassa riŋgii sutnje giitit dan ovddas.
– Ledjen biillain dalle vuodjime go riŋgii, ja mun gal veaháš healkkehin. Muhto prinseassa gal lei hui smáđáhkes, ja giittii skeaŋkka ovddas, muittaša Buljo.
Rune Rudberg ja Märtha Louise
Boaresbárdniid searvvis leat vel moadde eará gudnemiellahtu, earret eará Rune Rudberg.
– Seammat dát guokte searvvi gudnemiellahtu livččiiga heiven leat párra?
– In leat leamaš Rune Rudberg ságain guhkes áigái, inge dieđe leašgo dál náitalan vai leago ain boaresbárdni, bohkosa Buljo.
Dollet eará báikkiin
Soulspring, mii lea prinseassa eŋgelskuvla, ii sáhte dadjat nu olus áššái.
– Mii eat sáhte vuos lohkat dasa maidege, go eat leat ožžon bovdehusa searvvis, earret dan ahte mii lávet doallat kurssaid eará báikkiin, lohká Soulspring gulahallanolmmoš Carina Shceele Carlsen.
Dáinna čállosiin man Nils Mathis Buljo lea almmuhan facebookas, geahččala ealáskahttit searvvi:
(Ášši joatká dán vuolábealde)
Juovlabeavddi lágidit
Ealáskahttimis boaresbártniid searvvi de áigot sii dán jagi juovllaid lágidit juovlabeavddi gosa áigot bovdet erenomážit boaresnieiddaid.
Buljo muitalage ahte son lea Facebook bokte gulaskuddan beroštumi dákkár juovlabeavdái, ja ollusat leat juohkán su čállosa su Facebookas.
– Máŋggas leat vástidan, ja lulde maid áiggoše boaresnieiddat boahtit, muhto maiddái báikkálaš nieiddaide lea buresboahtin. Mis lea ahkemearri ahte galgá leahkit badjel 30-jahkásaš, ja galgá leahkit siŋgel, lohká Buljo.
