Ođđajagi vuosttaš beaivvi rájes ferte buot biilavuddjiin Norggas leat unna vuodjingoarttaš báŋkokoartta sturrodagas.
Stáhta Geaidnodoaimmahat dieđiha ahte sii, geain ain leat stuora guvgesrukses vuodjingoarttat maid adde jagiin 1979- 1997, fertejit ođastit goartta ovdal jahkemolsuma.
Buot unna vuodjingoarttažat leat olu jagiid ain dohkálaččat. Muhto dál lea ain 79 204 olbmos vuollel 80 jagi goarta man leat ožžon gaskal 1.4.1979 ja 1.1.1998.
Olbmot geat leat deavdán 80, eai leat váldon mielde dan lohkui, go sii fertejit ođastit goartta dearvvašvuođaduođaštusain, vaikko sis leage ođđamállet goarta. Sis lea muđui seamma áigemearri ođastit unna goarttažii go earáin.
Stáhta Geaidnodoaimmahaga siidduin sáhttá diŋgot diimmu lagamus johtolatstašuvdnii, ja sin siidduin leat eanet dieđut dán birra.
Sii čállet ahte ferte váldit fárrui legitimašuvnna, nugo báŋkokoartta mas lea govva ja riegádannummir, pássa (ii heahtepássa), nationála ID-koartta, vuodjingoartta mii lea addon maŋŋel 1.1. 1998, digitála vuodjingoartta, Suodjalusa ID-goartta dahje mearrajohtolatduođaštusa.
