Fylkkamánni dieđiha ahte boanddat, geat leat gártan errenáigái dahje sierravuhtii, sáhttet ain dikšut iežaset šibihiid nu guhká go čuvvot dearvvašvuođaeiseválddiid gáibádusa doalahit gaskka olbmuide ja buhtisvuođa gáibádusaid.
Trøndelága fylkkamánni dieđiha preassadieđáhusas ahte Álbmotdearvvašvuođainstituhtta ja dearvvašvuođadirektoráhtta leat árvvoštallan sáhttet go boanddat fitnat návehis ja dikšut iežaset elliid jus sidjiide lea njommon Covid-19 virus ja nu biddjon sierravuhtii dahje errenáigái.
Dearvvašvuođaeiseválddiid rávvágat:
– Ále bargga earáiguin fárrolaga.
– Doala 2 mehtera gaskka juohkehažžii geat fertejit boahtit šilljui, ovddamearkka dihtii mielkki viežžat, buktit fuođđariid dahje viežžat elliid njuovahahkii.
– Basa bures buot sajiid gokko olggobeale olmmoš sáhttá guoskat go viežžá mielkki dahje buktá gálvvuid šibitdollui ja nu ain, sihkkarastin dihtii ahte olmmoš, geas lea Covid-19 njoammudávda, ii njoammut earáide geat fertejit fitnat šibitdálus. Biebmobearráigeahču neahttasiiddus gávnnat eambbo dieđuid mo buvttadanelliid eaiggádat ja heastaeaiggádat ja eará elliid eaiggádat galget láhttet eastadan dihtii koronanjoammuma.
