-Almmuhus-
OĐĐASATBoanddat cahkkehedje várrehusdolaid – Máze boanda maid searvvai

Boanddat cahkkehedje várrehusdolaid – Máze boanda maid searvvai

-

-

Boanddat miehtá Norgga cahkkehit disdaga dolaid ja dainnalágiin čájehit vuostehágu ráđđehusa eanandoallodieđáhussii. Boanda Johnny Hætta Mázes bovde maid olbmuid boahtit ja doarjut boahtteáiggi eanandoalu.

Dolat galget leat diehtun ahte ráđđehusa eanandoallodieđáhus bidjá biebmobuvttadeami boasttu luotta ala, čállá Norgga boanddaidsearvi preassadieđáhusas.

 

Mázes cahkkeha dola

Máze áidna návetdoalu boanda Johnny Hætta ja su bearáš áigot cahkkehit dola odne diibmu 15 Áhkkučohkkás Mázes, ja bovde giliolbmuid boahtit doarjut boahtteáiggi eanandoalu.

– Mii cahkkehit stuora dola mii galgá leat várrehussan ráđđehusa eanandoallopolitihkkii, čilge Johnny Hætta.

– Lea dehálaš bisuhit eanandoalu miehtá Norgga, ja ráđđehus evttoha ruđalaččat beavttálmahttit eanandoalu. Dat ii harmonere Stuoradikki njuolggadusaide maid sii leat ovdal cealkán ahte buohkaide ferte leat sadji, dieđiha Máze boanda.
Johnny muitala maid ahte buohkat sáhttet cahkkehit dola, govvestit dan, ja juohkit sosiála mediaid bokte ja gilkorastit #norgetrengerbonden.

 

Dieđáhus bovttii vuostehágu

Eanandoallodieđáhus, man ráđđehus almmuhii ovdal juovllaid, bovttii ollu dovdduid ja vuostehágu.

Norgga boanddaidsearvvi jođiheaddji háliida doalahit iešguđetlágan návetdoaluid.

– Go cahkkehit dolaid miehtá riikka, de vuosttaldit eanandoallodieđáhusa mii nanne liberaliserema ja goarida politihka. Ii leat diehttelasvuohta ahte mis lea eanandoallu davimusas lulimussii dán riikkas, ii ge ahte leat valjit iešguđetlágan dálut. Dán áššis mii beroštit, ja háliidit eanet dakkár návetdoaluid, lohká Norgga Boanddaidsearvvi jođiheaddji Lars Petter Bartnes NTB:i.

 

-Almmuhus-