Boahtteáiggi sáŋgárat

Dán vahkku leat badjel 200 nuora miehtá Norgga čoahkkanan Utøyai geasseleirii.
Doppe sii ságastallet ođasmahtti energiija, biomáŋggabealatvuođa, nanaguoddevaš biktasiid ja nuoskkideami birra, dieđiha Luondu ja Nuorat preassadieđáhusas. 

Ovttas čájehit beroštumi

Sii áigot ovttas čájehit ahte nuorat, geat luonddus beroštit, leat albma sáŋgárat.
Guovdageainnu nuoraide lea hirbmat dehálaš gáhttet gilvihahtti eatnama. 

Luonddu ja Nuoraid Guovdageainnu jođiheaddji, Anja Risten Eira, muitala ahte máilmmi álbmot stuorru ja dálkkádatrievdamat dahket biebmobuvttademi váttisin. 

– Juohke riikkas lea geatnegasvuohta ja dárbu biebmat iežas álbmoga.
Dušše unna oasáš Norgga eatnamis lea gilvvihahtti, ja mii importeret 60 proseantta min biepmus.
Mii fertet váldit vára das mii mis lea, dan gilvvihahtti eatnamis ja earenoamážit boazodoalus, lasiha Eira. 

Skuvlejit boahtteáiggi sáŋgáriid

Luondu ja Nuorat,  ja eará luonddugáhttenberošteaddjit, leat geat skuvlejit boahtteáiggi sáŋgáriid.
Dán geasseleairras leat nuorra aktivisttat oahppan mo dáistalit oljojiehtanasain, ja mo bissehit dálkkádatrievdamiid. 

– Boahtteáiggi sáŋgárat – dat leat mii! Buohkat, geat barget luonddugáhttemiin, áŋgiruššet báikkálaš joavkkuin, oaččuhit olbmuit min searvái ja barget birasáššiiguin miehtá Norgga.
Dán leairras mii galgat oahppat mo mii sáhttit čoavdit dálkkádatváttisvuođa, ja mun sávan ahte mii buohkat mátkkoštit ruoktot merrediđolaččat, gergosat bargat viidáseappot, muitala Gaute Eiterjord, gii lea Luondu ja Nuoraid jođiheaddji.