Gáivuona váldodoaktáris lea čielga diehtu álbmogii maŋŋel go suohkanis leat duođaštuvvon logi koronanjoammuma.
Bearjadaga leat Gáivuona suohkanis 18 njoammuma.
Duorastaga ledje Gáivuonas logi olbmo isolašuvnnas koronavirusa geažil, ja oallugat leat ain vuordimin bohtosiid iežaset koronaiskosiin.
– Mii leat guorran njoammuma Dálošvákki skuvlii ja muhtin sosiála deaivvadeapmái. Dasa lassin lea koronavirus njommon guovtti olbmui eará suohkaniin, dieđiha Gáivuona váldodoavttir Anita Monsen Pedersen suohkana neahttasiidduin.
Sus lea čielga diehtu olbmuide vai nagodivččii bissehit dahje ráddjet njoammuma mii dál leavvá sin suohkanis.
– Boahkut iežat! Dalle suddjet iežat duođalaš buozalmasvuođa vuostá. Biso ruovttus jus leat buohcci! Ale heađisge bahkke sosiála deaivvademiide, bargui ja skuvlii. Jus dus leat dávdamearkkat, de sáhtát njoammudit virusa earáide. Ávžžuhus lea bissehit koronanjoammuma. Dasa lassin lea dehálaš bassat gieđaid. Jus dáid ávžžuhusaid čuovvu, de nákcet ráddjet njoammuma, lohká Pedersen.
Gáivuona suohkanis eai leat makkár ge báikkálaš njoammuneastadandoaimmat ja danin sáhttet olbmot eallit nu go dábálaččat jus eai leat makkár ge dávdamearkkat.
